Talabalar orasida koronavirus infeksiyasi aniqlangani sababli yana uchta — Toshkent, Samarqand va Andijondagi oliygohlar masofaviy ta’lim tizimiga o‘tkazildi.
Bular:
- Toshkent davlat texnika universiteti;
- Samarqand shahridagi Ipak yo‘li turizm xalqaro universiteti;
- Andijon qishloq xo‘jaligi va agrotexnologiyalar instituti.
Epidemiologik vaziyat barqarorlashgandan so‘ng an’anaviy o‘quv jarayoniga qaytish to‘g‘risida xabar beriladi.
Eslatib o‘tamiz, 27-apreldan Toshkent davlat agrar universiteti, Toshkent davlat iqtisodiyot universiteti Samarqand filiali, 28-apreldan Samarqand veterinariya meditsinasi instituti Toshkent filiali, O‘zbekiston davlat san’at va madaniyat instituti, 30-apreldan Jizzax davlat pedagogika instituti vaqtinchalik masofaviy ta’limga o‘tkazilgandi.
O‘zbekistonda 29-aprel kuni koronavirus infeksiyasini yuqtirib olish bilan bog‘liq 402 ta yangi holat ro‘yxatga olindi — bu kunlik kasallanish ko‘rsatkichi bo‘yicha 2021-yilning eng yuqori ko‘rsatkichidir. Shuningdek, 2 nafar koronavirusga chalingan bemor vafot etib, kasallikdan vafot etganlar soni 649 nafarni tashkil qilmoqda. Ayni paytda tibbiyot muassasalarida 3092 nafar bemor davolanmoqda.
Izoh (0)