Toshkentda Pokistondan kelgan tilanchilar ko‘paygani ma’lum qilindi

Ijtimoiy tarmoqlarda Toshkent aholisi poytaxt ko‘chalarida Pokistondan kelgan tilanchilar ko‘payganini ma’lum qilmoqda. Facebook’dagi “Potrebitel.uz” guruhi a’zolari Darhondagi sobiq “Rossiya” mehmonxonasi, “Chorsu” va “Gospitalniy” bozorlarida tilanchilar ko‘payganini yozmoqda.

Ta’kidlanishicha, pokistonliklar yakka va oila-oila bo‘lib yurmoqda. Ingliz va o‘zbek tilida so‘zlashib, “50 ming so‘m ber” jumlasini yodlab olgan. Hammasi bir xil 50 ming so‘m so‘rayapti, agar kimdir bersa, 100 ming so‘m so‘rashga o‘tgan. 20 ming so‘m berilganida esa xo‘mrayib olmoqda.

Ayrim tilanchilar ko‘chalarda yurgan bo‘lsa, ayrimlari ofis va do‘konlarga kirmoqda. Ba’zi poytaxt aholisi ular bilan ingliz va hatto urdu tilida suhbat qurgan. Ularni Pokiston elchixonasigacha olib borib qo‘yish borasidagi yordamni ular mutlaqo rad etgan. Aytishlaricha, samolyot orqali parvoz qilish qimmat, shu sababli Termizgacha ketish uchun pul to‘plamoqda. U yerdan Afg‘oniston orqali Pokistonga yetib olishmoqchi.

“Barcha ulardan bu yerga qanday qilib kelib qolganliklarini so‘ramoqda. Kimdir ularni Toshkentga olib kelib, tashlab ketdimi? Tilanchilarning so‘zlariga ko‘ra, ular Toshkentga pul ishlash maqsadida turistik viza orqali kelgan, hech kim olib kelmagan. Ehson qilgan ko‘plab insonlarning aytishicha, pokistonliklar hozirga qadar Parijga yetib oladigan pulni yig‘ib bo‘lgan”, — deyiladi xabarda.

Eslatib o‘tamiz, 2019-yilning yanvarida Shavkat Mirziyoyev tilanchilik uchun ma’muriy va jinoiy javobgarlikni joriy etishni ko‘zda tutuvchi qonunni imzolagandi. Qonunga muvofiq, jamoat joylarida pul, oziq-ovqat mahsulotlari va boshqa moddiy qimmatliklar berishni faol tarzda so‘rab tilanchilik bilan shug‘ullanish, shunday qilmish uchun ma’muriy jazoga tortiladi, ma’muriy jazo qo‘llanilganidan keyin sodir etilgan bo‘lsa, 240 soatgacha majburiy jamoat ishlari yoki 2 yilgacha axloq tuzatish ishlari yoxud bir yilgacha ozodlikni cheklash yoki bir yilgacha ozodlikdan mahrum qilish bilan jazolanadi.

“Gazeta.uz”ning eslatib o‘tishicha, IIV 2018-yilda Toshkentda tilanchilik bilan shug‘ullanuvchi 5000 dan ortiq kishini aniqlagan. Ular reabilitatsiya markazlariga yuborilgan. Tilanchilik bilan shug‘ullanganlarning 4000 dan ortig‘ini ayollar (shundan 3000 ming nafari yosh bolalilar), 500 nafarini keksa yoshdagilar, 100 nafarini esa nogiron erkaklar tashkil etgan.