Alisher Navoiy nomidagi Toshkent davlat o‘zbek tili va adabiyoti universitetida darslar 19-apreldan masofaviy shaklga o‘tkazildi. Bu haqda universitet matbuot xizmati ma’lum qildi.
Qayd etilishicha, bunga ushbu OTMning professor-o‘qituvchilari, talabalari orasida koronavirusga chalinish holati aniqlangani sabab bo‘lgan.
Xabarda masofaviy o‘qish qachongacha davom etishiga aniqlik kiritilmagan bo‘lib, epidemiologik vaziyat barqarorlashgach, an’anaviy o‘quv jarayoniga qaytish borasida qo‘shimcha xabar berilishi qayd etilgan.
Bundan avval O‘zbekiston jurnalistika va ommaviy kommunikatsiyalar universitetining yotoqxonasida yashovchi talabada koronavirus aniqlangani sabab universitet yotoqxonasi karantinga olingandi. Bundan tashqari, talablar uchun o‘qish jarayonlari 12-apreldan boshlab ikki haftaga onlayn shaklga o‘tkazilishi ma’lum qilingandi.
O‘zbekiston davlat konservatoriyasida va Toshkent moliya institutida ham darslar 26-martdan 8-aprelga qadar (14 kun) masofaviy shaklga o‘tkazilgandi. Toshkent transport universiteti talabasida ham koronavirus aniqlangani sabab fakultet talabalari masofaviy ta’limga o‘tkazilgan, Toshkentdagi Inha universiteti talabasida koronavirus aniqlangani sabab 23-martdan boshlab ikki hafta karantinga yopilgan.
Izoh (0)