Toyota kompaniyasi 2012-yilda taqdim etilgan GT 86’ning avlodi — GR 86 sportkarini taqdim etdi. Yangi model Toyota Gazoo Racing va Subaru hamkorligida yaratilgan hamda ikkinchi avlod BRZ kupesi bilan unifikatsiya qilingan, deb xabar beradi Motor.
2020-yilning kuzida taqdim etilgan Subaru BRZ va Toyota sportkupesining tashqi ko‘rinishida old hamda orqa bamperlari farq qiladi, modellarning kuzov panellari esa bir xil. BRZ kabi indeksi GR 86’ga o‘zgargach, sportkar oldingi platformasini saqlab qolgan. Ikki eshikli Toyota’ning g‘ildiraklar bazasi besh millimetrga, kuzovining uzunligi 30 millimetrga oshgan, balandligi esa 10 millimetrga qisqargan. Mashinaning osti va yo‘l yuzasi orasidagi masofa 130 millimetrni tashkil etadi, g‘ildiraklar o‘lchami — 18 dyuym.
Mashinaning og‘irligi 50 kilogrammga oshib, “mexanika” versiyasida 1270 kilogrammga yetgan. Qanot va tom qismi alyuminiydan ishlanmaganida, shuningdek, o‘rindiqlar yengillashtirilmaganida mashina bundan ham og‘irroq bo‘lishi mumkin edi. Kompaniyadagilarning ta’kidlashicha, balandlikning qisqartirilishi va og‘irlikning yaxshi taqsimlanishi “favqulodda past” og‘irlik markazini hamda yaxshi manyovrchanlikni ta’minlagan.
Sportkar salonida diagonali yetti dyuymga teng virtual qurilmalar paneli paydo bo‘lgan, Apple CarPlay va Android Auto protokollarini qo‘llab-quvvatlovchi multimedia tizimi esa sakkiz dyuymli ekranga joylashtirilgan. Bundan tashqari, GR 86 Subaru’ning EyeSight xavfsizlik tizimiga ega bo‘lgan — u avtomat versiya bilan taqdim etiladi.
Texnik jihatdan GR 86 va Subaru BRZ to‘liq unifikatsiya qilingan. Toyota’ning yangi modeliga ham 235 ot kuchini taqdim etishga qodir 2,4 litrli motor o‘rnatilgan. Mashina soatiga 100 kilometr tezlikka 6,3 soniyada erishadi.
Avvalroq AQShda 49 dyuymli g‘ildiraklar o‘rnatilgan maxluqsimon Toyota yo‘ltanlamasi sotuvga qo‘yilgani to‘g‘risida xabar berilgandi.
Izoh (0)