Qashqadaryoning Kitob tumanida Nexia-3 haydovchisi YTHga uchrab vafot etdi.
Voqea 27-mart kuni soat 19:00 lar atrofida tumanning “Qaynar” MFY hududidan o‘tuvchi M-39 Toshkent—Termiz avtomobil yo‘lida yuz bergan. J.T. Nexia-3 avtomashinasini Toshkent—Kitob yo‘nalishi bo‘yicha haydab ketayotib, rul boshqaruvini yo‘qotgan va ag‘darilgan.
Oqibatda haydovchi bosh miya yopiq jarohati, miya chayqalishi bilan tan jarohati olib, kasalxonaga yotqizilgan, ammo shifokorlarning tezkor harakatlariga qaramasdan olgan tan jarohatlari tufayli vafot etgan.
Holat yuzasidan tuman IIB huzuridagi Tergov bo‘limi xodimlari tomonidan tergovga qadar surishtiruv ishlari amalga oshirilmoqda.
Dastlabki surishtiruv xulosalariga ko‘ra, ushbu yo‘lning xavfli burilish qismida marhum avtomobilda yuqori tezlikda harakatlangan va natijada boshqaruvni yo‘qotib, yo‘lning chap tomoniga ag‘darilib ketgan bo‘lishi mumkin.
Avvalroq Qoraqalpog‘istonda Cobalt yo‘l chetidagi betonga urilishi oqibatida uning haydovchisi vafot etgani, Toshkentda Lacetti va Spark to‘qnashuvi oqibatida haydovchilarning biri shifoxonaga yotqizilgani, Samarqandda yomg‘irli havoda yuk mashinasini quvib o‘tishga uringan Cobalt “KamAZ” bilan to‘qnashishi oqibatida ikki kishi halok bo‘lgani haqida xabar berilgan edi.
Izoh (0)