Moskva havosida chang konsentratsiyasi oshdi, lekin hozircha u me’yoriy miqdor doirasidan oshgani yo‘q. Bu haqda poytaxt shahar xo‘jaligi kompleksining Telegram kanaliga tayanib “RBK” xabar berdi.

“Barcha avtomatlashtirilgan havo nazorati stansiyalarining ma’lumotlariga ko‘ra, shahar hududida muallaq PM10 (juda mayda chang) zarralar konsentratsiyasining oshishi qayd etildi”, — deyiladi xabarda.

17-mart kuni soat 17:00 da maksimal bir martalik konsentratsiyalar gigiyena me’yoridan oshmadi, deb ma’lumot berdi hukumat “Mosekomonitoring”ga tayanib.

Mutaxassislar fikriga ko‘ra, chang hozir shunday bo‘ronlar avj olayotgan hududlardan uchib kelgan bo‘lishi mumkin. “Cho‘l qumlari ko‘pincha Yevrosiyo qit’asidan keladi: masalan, 2014-yilda shamol Londonga Sahroi Kabir qumlarini keltirgan edi”, — deb ta’kidlagan mansabdorlar.

Avvalroq qum bo‘ronlari Mo‘g‘uliston, Xitoy va Fors ko‘rfazi mamlakatlarini ham qamrab olgan edi. Pekinda noqulay ob-havo sababli 400 dan ortiq aviareyslar bekor qilindi. Bo‘ron tufayli shaharning ayrim hududlarida PM10 mayda zarrachalarining konsentratsiyasi JSST tomonidan tavsiya etilgan me’yordan 160 barobar yuqori bo‘ldi.

Shuningdek, Qozog‘istonning Mang‘istov viloyatini ham qum bo‘roni qopladi. Mahalliy aholi ijtimoiy tarmoqlarda noqulay ob-havoning videotasvirlari bilan bo‘lishdi. Avvalroq Favqulodda holatlar departamenti shamol tezligi soniyasiga 17—22 metrgacha kuchayishini ma’lum qilib, bo‘ron haqida ogohlantirgan edi.