Futzal bo‘yicha OKMK futzal jamoasining 26 yoshli o‘yinchisi Timur Berdiyev avtohalokatga uchrab vafot etdi. Bu haqidagi ma’lumotni “Daryo” manbasi tasdiqladi.
Manbaning tasdiqlashicha, futzalchi 2021-yil 27-fevral, shanba kuni Andijondan Toshkentga Matiz avtomashinasida yo‘lovchi sifatida qaytayotgan bo‘lgan. Qamchiq dovonida esa Matiz, Nexia va Tico avtomobillari yo‘l transport hodisasini vujudga keltirgan. Ushbu to‘qnashuv oqibatida Timur Berdiyev vafot etgan. Tico’da bo‘lgan bir nafar yo‘lovchi esa tan jarohati olgan. Hodisaning boshqa tafsilotlari hozircha ma’lum emas
Ma’lumot uchun, Timur Berdiyev 1995-yil tavallud topgan. Uning futzaldagi faoliyati havaskorlar ligasida boshlangan va “Ardus”, “Paxtakor” va OKMK futbol klublari safida to‘p surgan. Professional futbol ligasi matbuot xizmati xabariga ko‘ra, Berdiyev 2021-yil qishki transferlar oynasida Bishkekning “Farvater” jamoasiga o‘tishi rejalashtirilgan edi.
Eslatib o‘tamiz, 2019-yil fevralida o‘zbekistonlik sobiq futbolchi Sirojiddin Sayfiyev saraton kasalligidan vafot etgandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)