Britaniyalik aktyor Dominik Kuper so‘nggi bir yil ichida to‘rtinchi avtomobilidan ayrildi, deb xabar beradi Motor. Ma’lum bo‘lishicha, bu safar Kuperning “Need For Speed: Tezlik ishtiyoqi” filmi orqali tanilgan noyob modellaridan biri — 1978-yilgi Ferrari Dino 308 GT4’i o‘g‘irlab ketilgan.
Noyob qizil Ferrari o‘tgan hafta aktyorning London shimoliy qismidagi uyi yaqinida bo‘lgan avtoturargohdan o‘g‘irlangan. 43 yillik avtomobilning taxminiy narxi 83 ming funtni tashkil etadi.
Kuper do‘stlarining so‘zlariga ko‘ra, aktyor o‘zining sevimli avtomobillaridan biri bo‘lgan mazkur sportkarning yo‘qolganidan qattiq tashvishda. Ularning aytishicha, so‘nggi bir yil ichida mashinalari o‘g‘irlanayotgan Kuper doimiy qo‘rquvda bo‘lib, u o‘zini ta’qib qilishayotganidan xavotirga tushmoqda.
Ushbu o‘g‘irlik aktyor uchun so‘nggi bir yil ichidagi to‘rtinchi hisoblanadi: avvalroq britaniyalikning Austin-Healey, Range Rover klassik modellari va tom qismi ochiladigan 54 ming dollarlik Jaguar F-Type’i o‘g‘irlangan. Kuper o‘g‘irlik haqida zudlik bilan politsiyaga murojaat qilgan va yaqin atrofdagi mashina o‘g‘rilari borligi haqida qo‘shnilarini ogohlantirgan.
Avvalroq amerikalik erkak ikki oyda ikkita bir xil Kia avtomobilidan ayrilgani to‘g‘risida xabar berilgandi.
Izoh (0)