Moychechak dorivor o‘simlik sifatida yaxshi tanish bo‘lib, undan damlangan choy stressni yo‘qotish, asablarni tinchlantirish va uyqu muammolarini yengillashtirishda yaxshi samara beradi. O‘simlik damlamasi ham tinchlantiruvchi ta’sirga ega bo‘lib, terini namlaydi va nuqsonlarga qarshi kurashishda yordam beradi.
Moychechak, ayniqsa, universalligi bilan foydali: u barcha turdagi teri muammolarida qo‘l keladi. U quruq va ta’sirchan terini namlaydi, yumshatadi, teri qichishi va sho‘ralashida yordam beradi. Agar teringiz yog‘li bo‘lib, yallig‘lanishga moyil bo‘lsa, o‘simlik tarkibidagi antibakterial komponentlar yallig‘lanishni yengillashtiradi va yog‘ hosil bo‘lish jarayonini normallashtiradi.
Moychechak guli tarkibidagi kumarin moddasi zararlangan teri hujayralarini tiklaydi, husnbuzar va toshmalarga qarshi samarali kurashadi. Kuchli antioksidant hisoblanadigan — karotin esa teri yuzasini tekislaydi, uni erkin radikal zararlanishdan himoya qiladi va qarish jarayonini sekinlashtiradi.
Moychechakdan teri muammolarida qanday foydalaniladi?
Quritilgan moychechak gullarini dorixonalardan bemalol topish mumkin: o‘simlik tayyor holdagi filtr qadoqlarda yoki maydalangan holda sotiladi. Qadoqda ko‘rsatilgan nisbatdagi moychechakni (odatda bir osh qoshiq yoki bir filtr qadoq 1 stakan suvga mo‘ljallangan bo‘ladi) damlab, 30-40 daqiqa davomida tindiring, so‘ngra suzib, iliq holga kelguncha soviting.
Damlamani yuz va bo‘yin sohasi uchun tonik sifatida ishlating: tozalangan teriga kuniga ikki mahal surting, muolajadan so‘ng oziqlantiruvchi krem ishlatish mumkin.
Yana bir variant — damlamani muzlatib, ertalab muz bo‘laklari bilan yuzingizni arting. Moychechakli muz bo‘laklari uxlab turgandan keyingi yuz shishishlarini yo‘qotadi va yuzingizga tabiiylik baxsh etadi.
Izoh (0)