Turkiyaning Milliy razvedka tashkiloti tomonidan o‘tkazilgan maxsus operatsiyada muxolifatchi Fathulloh Gulen tashkilotining (FETO) a’zolari Gurbuz Sevilay va Tamer Avji qo‘lga olinib, Turkiyaga olib kelingani ma’lum qilindi. Bu haqda Haberler nashri xabar berdi.
Qo‘lga olingan qochoq “fetochilar” Iroq va Suriyadagi terrorchi tashkilot YPG/PYD-PKKlarga o‘q-dori, raketa, antidron, radar tizimi kabi uskunalar bilan ta’minlashda ishtirok etgani aytilmoqda.
Turkiya mudofaa sanoatida ishlagan Gurbuz Sevilay 2016-yilgi davlat to‘ntarishidan keyin lavozimidan ozod qilingan.
Gurbuz Sevilay O‘zbekistondan turib FETO a’zolariga moddiy yordam ko‘rsatib kelgan. U Turkiyada davlat tashkilotlariga sizdirilgan tashkilot a’zolarining iltimosi bilan xorijdagi noqonuniy savdolarni amalga oshirgan. Buni Ukraina va Qirg‘izistonda ochgan firmalari orqali amalga oshirgani aniqlangan. Tamer Avji esa tashkilotga yangi a’zolar topish va ularni joylashtirish bilan shug‘ullangan.
Mavzuga doir: Turkiyada 2016-yildagi davlat to‘ntarishi qatnashchilarining bir guruhi umrbod qamoq jazosiga hukm qilindi
Keyinroq Turkiyada 50 mingdan ortiq odam hibsga olingan, 160 mingdan ortiq davlat xizmatchisi, shu jumladan, harbiylar ishdan bo‘shatilgan yoki chetlatilgan.
Turkiya hukumati FETO muxolifat tashkiloti yetakchisi Fathulloh Gulenni davlat to‘ntarishiga aloqadorlikda ayblagan. AQShda yashaydigan Gulenning o‘zi esa davlat to‘ntarishini qoralagan va ayblovlarni rad etgan.
Izoh (0)