“Jenoa”ga qarshi o‘yin oldidan “Napoli” yetakchisida koronavirus aniqlandi

“Napoli” himoyachisi Kalidu Kulibalining koronavirusga topshirgan testi ijobiy xulosa berdi.

Neapolliklar matbuot xizmatining ma’lum qilishicha, senegallik futbolchida kasallik alomatlarsiz o‘tmoqda. U o‘z uyida izolyatsiyaga olingan.

6-fevral kuni “Napoli” Eldor Shomurodovning “Jenoa”siga qarshi o‘ynaydi, 10-fevral kuni Italiya Kubogi yarim finalida “Atalanta”ga qarshi bahs yuritadi. 13-fevral kuni neapolliklarni “Yuventus”ga qarshi o‘yin kutib turibdi. Shu tariqa futbolchi genuyaliklarga qarshi uchrashuvni o‘tkazib yuboradi, “Yuventus”ga qarshi o‘yinda ishtirok etishi esa so‘roq ostida turibdi.

Kulibali A Seriya joriy mavsumida 15 ta o‘yinda maydonga tushdi.

“Jenoa” — “Napoli” uchrashuvi Toshkent vaqti bilan 6-fevraldan 7-fevralga o‘tar kechasi 00:45 da boshlanadi.