Chimboy tumani hokimi lavozimiga yaqinda tayinlangan Aybek Tajetdinov xizmatda foydalanish uchun Equinox avtomobilini xarid qilish fikridan qaytdi, deya xabar bermoqda “Kun.uz”.
“Kun.uz” nashrida e’lon qilingan “Chimboydagi o‘quvchilar 8 kilometr uzoqlikdagi maktabga eshakda borishmoqda” sarlavhasi ostidagi xabardan keyin ijtimoiy tarmoqda turli bahs-munozaralar paydo bo‘ldi. Xususan, “Troll.uz” Telegram-kanalida “Chimboy tumanida o‘quvchilar eshak minib maktabga qatnamoqda. Shu tumanga hokim bo‘lgan Aybek Tajetdinov hokim bo‘lganidan 1 oy o‘tib Equinox xarid qilgan”, – deb yozildi.
Chimboy tumani hokimligi axborot xizmati rahbari Nargiza Toliboyevaning aytishicha, Equinox xaridi bekor qilingan.
“Avtomashina xaridi uchun pul ham o‘tkazilmagan. Hokim hozirda o‘zining avvalgi Captiva’sida yuribdi”, — dedi hokimning matbuot kotibi.
Ma’lumot uchun, ilgari Vazirlar Kengashi raisining birinchi o‘rinbosari lavozimida, hozir esa Chimboy tumani hokimi bo‘lgan Aybek Tajetdinov UzAuto Motors kompaniyasi tomonidan ishlab chiqarilgan Equinox rusumli mashinani 349 million so‘mga sotib olish bo‘yicha shartnomani 2020-yilning 21-dekabr kuni imzolagan.
Shartnoma muddati 10 kun qilib ko‘rsatilgan. Ammo Chimboy tumani hokimligi bosh hisobchisi Zaxaratdin Jiyemuratovning aytishicha, shartnoma to‘liq bekor qilingan. Shartnomada ko‘rsatilgan pul ham o‘tkazilmagan.
Shu bilan birga, “Troll.uz” 8 kilometr yo‘l bosib maktabga qatnaydigan o‘quvchilar uchun avtobus tashkil qilish taklifini bildirgan.
Eslatib o‘tamiz, 2020-yil noyabr oyi boshida Zarbdor tumani hokimi Zafar Ro‘ziyev Captiva xizmat mashinasi bo‘la turib, 370 million so‘mga Trailblazer, shuningdek, pandemiya davrida Uchqo‘rg‘on, Pop, Qo‘shrabot va Narpay tumanlari hokimliklari ham Trailblazer sotib olgani to‘g‘risida xabar berilgandi. Denov tumani hokimligi esa karantin kuchaytirilgan paytda — 2020-yilning iyulida 398 million so‘mga Trailblazer LTZ-AT, Namangan viloyati hokimligi ham iyulda budjet mablag‘lari hisobidan 1 milliard 579 million so‘mga Toyota LC200 avtomobilini hamda sentabr oyida qariyb 400 million so‘mga Trailblazer LTZ-AT rusumli avtomobil xarid qilgan.
Bundan tashqari, Mirzacho‘l tumani hokimligi 370 million so‘mga Trailblazer, Qashqadaryo viloyati hokimligi hokim o‘rinbosariga 349 million so‘mga Equinox, hokimning xotin-qizlar masalalari bo‘yicha maslahatchisiga, yordamchisi hamda ishlar boshqarmasi boshlig‘iga 621 million so‘mga 3 ta Tracker xizmat mashinalari sotib olgan.
Korrupsiyaga qarshi kurashish agentligi direktori Akmal Burhonov mansabdor shaxslar pandemiya sharoitida davlat mablag‘larining samarali sarflanishi naqadar muhim ekanligini to‘la anglab yetmayotgani, qimmat narxlardagi xizmat avtotransportlarini xarid qilinayotganiga munosabat ham bildirgan. Shuningdek, Prezidentning yangi qaroriga ko‘ra, tuman hokimlariga narxi 267,5 million so‘mdan yuqori xizmat avtomobili sotib olish taqiqlanishi mumkinligi ma’lum qilingandi.
Izoh (0)