Toshkentda ochilgan ochiq osmon ostidagi muz maydonini tashkil etish uchun davlat budjetidan pul sarflanmagan. Bu haqda O‘zbekiston bosh vaziri o‘rinbosari — Turizmni rivojlantirish davlat qo‘mitasi raisi Aziz Abduhakimov “Daryo” muxbiri Mirolim Isajonovga bergan qisqa intervyusida aytib o‘tdi.
7-yanvar kuni Alisher Navoiy nomidagi davlat akademik katta teatri oldida muz maydoni ochildi. U “aholi orasida sog‘lom turmush tarzi hamda sportni keng targ‘ib qilish” maqsadida tashkil etilgan. Muz maydoni bir oy muddatga o‘rnatilgan bo‘lib, bu vaqt mobaynida Dance Music Fest Winter, Iosis Fest, Tashkent Rap Festival kabi musiqa festivallari, xokkey bo‘yicha o‘smirlar chempionati, muz ustida raqs shousi kabi tadbirlar o‘tkazilishi rejalashtirilgan.
Ochilish marosimida Rossiya muz sporti yulduzi, figurali uchish bo‘yicha olimpiya chempioni Aleksey Yagudin chiqish qilgan.Mazkur loyiha uchun tegishli uskunalar Rossiyadan ijaraga olib kelindi. Barcha tashkiliy masalalar — mutaxassislarni olib kelish, transport xarajatlari, turli maxsus kimyoviy moddalar va ularni saqlash, mashhur figurist Aleksey Yagudinning gonorari, elektr energiya harajatlarini qo‘shib hisoblaganda, jami mablag‘ taxminan 800-900 million so‘mga to‘g‘ri kelmoqda. Bularni o‘zimizning targ‘ibot-tashviqot ishlarimiz doirasida tashkil etyapmiz. Bu borada bizning hamkorlarimiz bor va ular ham o‘zlarining mablag‘larini kiritishgan. Buning uchun budjetdan umuman pul sarflamadik. Faqatgina tegishli infrastrukturani yaratish, texnikalarni Rossiyadan ijaraga olib kelish jarayonida bojxonadan qisqa vaqt ichida o‘tishiga yordam berdik. Ko‘rib turibsizki, bu o‘zini oqlaydigan yaxshi bir loyihaga aylandi.Avvalroq 2022-yilda O‘zbekistonning boshqa yirik shaharlarida ham ochiq osmon ostidagi muz maydonlari tashkil etilishi mumkinligi ma’lum qilingan edi.Keyingi yilda tadbirkorlar va tashabbuskorlar mana shunday taklif bilan chiqadigan bo‘lsa, bu yo‘nalishda ularga, albatta, yordam beramiz. Eng muhimi, biz bunday tadbirlarni budjet mablag‘larini sarflamagan holda tashkil etishni ko‘proq o‘ylayapmiz. Pandemiya odamlarga o‘z ta’sirini o‘tkazmoqda. Budjet mablag‘larini birinchi navbatda sog‘liqni saqlash sohasiga yo‘naltirishimiz kerak. Umuman olganda, hayot davom etadi, odamlarimizga mana shunday yangiliklarni taklif etishimiz kerak, aholining kayfiyatini ko‘tarishimiz lozim. Agar tashabbuskorlar paydo bo‘lsa, biz shunday loyihalarni qo‘llab-quvvatlaymiz.
Aziz Abduhakimov, O‘zbekiston bosh vaziri o‘rinbosari
Izoh (0)