Toshkent metrosida 2021-yilning iyun oyiga qadar tabaqalashtirilgan tarif tizimi yo‘lga qo‘yilishi kutilmoqda. Bu haqda O‘zbekiston transport vaziri vazifasini bajaruvchi Ilhom Mahkamov “Daryo” muxbiri Mirolim Isajonov bilan suhbatda ma’lum qildi.
“Bugun metro yo‘nalishlari uzunligi ortmoqda. Ammo bir-ikki kilometr yurgan odam ham 1400 so‘m to‘laydi, 10-15 kilometr foydalangan odam ham 1400 so‘m to‘lamoqda. Yaqinda avtomatlashtirilgan to‘lov tizimini tatbiq qildik. Bu bizga tahlil qilish imkoniyatini yaratib beradi”, — deydi Mahkamov.
Uning so‘zlariga ko‘ra, ikki-uch oylik tahlillardan so‘ng, “kimning qancha masofa yurgani va uning tannarxga ta’siridan kelib chiqib”, tabaqalashtirilgan tarif tizimini yo‘lga qo‘yish rejalashtirilgan. “Bu tizim shu yilning yarmigacha ham bormay amaliyotga joriy qilinadi”, — dedi u.
Ma’lumot uchun, 2020-yilda Toshkentda 14 ta yangi metro bekati foydalanishga topshirildi. 2021—2023-yillarda metroning “Chilonzor” yo‘nalishini TTZ dahasiga qadar uzaytirish, yer usti halqa metro yo‘lining ikkinchi navbatini qurish rejalashtirilgan.
Izoh (0)