Farzand dunyoga kelishi hamisha eng yaxshi voqea va xushxabarlardan biri bo‘lgan. Quyida nomi keltirilgan juftliklar esa 2021-yilda ushbu baxtni his qilish arafasida.
Emma Stoun va Deyv Makkeri
2019-yilda turmush qurishni rejalashtirgani haqida ma’lum qilgan juftlikning to‘y marosimi 2020-yilning mayida bo‘lishi kerak edi, ammo pandemiya sabab qoldirildi. Shundan keyin ular boshqalarga ovoza qilmasdan turmush qurgan. Emmaning ko‘rinishida o‘zgarish borligini payqagan muxlislari Stounning homiladorligini taxmin qila boshlagan. Uning o‘zi buni inkor qilsa ham, yaqin do‘stlari Emma va Dayvning yaqin orada farzandli bo‘lishini ma’lum qilgan.
Emili Ratakovski va Sebastyan Bear-Makklard
2018-yilda prodyuser Sebastyan bilan turmush qurgan amerikalik model 2020-yilning oktabrida farzand kutayotgani haqida ma’lum qilgan. Vogue jurnali uchun suratga tushgan va onalik haqida maxsus esse yozgan. Ratakovski hamisha farzandi qiz bo‘lishini istagani, ammo zamonaviy olamda ayol bo‘lish oson emasligini, shuningdek, chaqaloqning jinsini bilishga shoshilmasligini ta’kidlagan.
Xilari Daff va Mettyu Koma
Xilari va Mettyu 2019-yilda turmush qurgan. Qiz farzandi bo‘lgan juftlik yaqinda ikkinchi marta ota-ona bo‘lishini bildirgan. Aktrisa ijtimoiy tarmoqqa video joylab, oilasi ko‘payish arafasida ekanligini yozib qoldirgan.
Rouz Lesli va Kit Xarington
“Taxtlar o‘yini” serialining suratga tushish maydonchasida tanishgan juftlik 2018-yilda turmush qurgan. Make Magazine jurnali uchun suratga tushganidan keyin muxlislari Leslining farzand kutayotgani haqida xabar topgan. Rouz bundan xursand ekanini ta’kidlab, oilaning yangi a’zosi bilan tanishishga oshiqayotganini ma’lum qilgan.
Pippa Middlton va Jeyms Mettyuz
2021-yil kirib kelish arafasida Keyt Middlton singlisining ikkinchi marta ona bo‘lishi ma’lum bo‘lgan. Ushbu xushxabar Page Six nashri saytida e’lon qilingan. Nashr muharrirlari 2020-yilning og‘ir kelganiga qaramay, juftlik ushbu fantastik yangilikdan xursand ekanini ma’lum qilgan. Ma’lumot uchun, Pippa va Jeyms 2017-yilda turmush qurgan va bir yarim yildan keyin farzandi Artur dunyoga kelgan.
Izoh (0)