Ilk iPhone modelining taqdimotidan 13 yil o‘tib, uni ishlab chiqarish jarayoni tasvirlangan arxiv suratlar e’lon qilindi, deb xabar beradi Hi-Tech.Mail.ru.
Suratlarda smartfonlarni sinovdan o‘tkazish jarayonini ko‘rish mumkin, oddiyroq qilib aytganda — sifat nazoratini. Bu birinchi iPhone partiyalarini ishlab chiqarishning eng qizg‘in pallasi hisoblanadi. Apple sobiq muhandisi Bob Berrouning so‘zlariga ko‘ra, suratlar 2007-yilning bahorida olingan.
Aftidan, suratlar Foxconn kompaniyasining zavodida olingan bo‘lib, Apple u bilan hamon hamkorlik qilib keladi. Unda o‘nlab iPhone qurilmalari barcha funksiyalarni sinovdan o‘tkazishga mo‘ljallangan maxsus ustunlarga qotirilgan — maxsus dasturlar kameralarni yoqadi, aloqani va qolgan barcha parametrlarni tekshiradi.
Alohida modellarni odamlar qo‘lda tekshiradi — bu dastlabki bosqichlarda yuzaga kelishi mumkin bo‘lgan ommaviy nuqsonlar oldini olishga yordam beradi.
Apple dunyodagi eng yopiq kompaniyalardan biri hisoblanadi, shu sababli kompaniya kamdan kam hollarda ish jarayonlariga oid ma’lumotlarni e’lon qiladi.
