PSJ klubi bosh murabbiyi Tomas Tuxel iste’foga chiqarildi, deb xabar bermoqda Bild nashri.
RMC Sport’ning yozishicha, germaniyalik mutaxassis 23-dekabr, chorshanba kuni PSJ sport direktori Leonardo bilan uchrashgan. Unda murabbiyning ishdan olingani ma’lum qilingan.
Tuxelning parijliklar bilan shartnomasi 2021-yil yozida yakuniga yetardi. Bild’ning ta’kidlashicha, murabbiy Angliya Premyer Ligasida faoliyatini davom ettirishi mumkin.
RMC Sport manbasiga ko‘ra PSJning yangi bosh murabbiyi “Tottenhem” sobiq ustozi Maurisio Pochettino bo‘ladi. Argentinalik mutaxassis London klubini tark etganidan beri (2019-yil kuzi) ishsiz yuribdi.
Tuxel 2018-yilda PSJga bosh murabbiy etib tayinlangandi. U 2 yil vaqt oralig‘ida jamoa bilan 6 ta sovringa ega chiqdi. Jumladan, ikki karra Fransiya chempionligini qo‘lga kiritdi.
PSJ Liga 1 ning 2020/21-yilgi mavsumida musobaqa jadvalida ayni chog‘da 3-o‘rinda bormoqda. Jamoa peshqadamlar — “Lion” va “Lill”dan 1 ochkoga ortda qolmoqda.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)