Madaniyat vazirligiga qarashli madaniy meros obyektlarining ta’mirga muhtojlarini 2021-yilda rekonstruksiya qilish maqsadida davlat budjetidan 70 milliard so‘mdan ziyod mablag‘ ajratilishi rejalashtirilgan. Bu haqda 14-dekabr kuni bo‘lib o‘tgan matbuot anjumanida madaniyat vaziri o‘rinbosari, madaniy meros departamenti boshlig‘i Kamola Oqilova ma’lum qildi, deya xabar bermoqda “Daryo” muxbiri.
Oqilova xonimning ta’kidlashicha, madaniy meros obyektlarining buzilish holati bo‘yicha monitoring ishlari doimiy ravishda olib borilmoqda.
“Oxirgi paytlarda ijtimoiy tarmoqlarda qaysidir hududdagi madaniy meros obyektlarining buzilishi yoki ta’mir talab ekanligi keng muhokama qilinmoqda. Biz bu bo‘yicha ham monitoring ishlarini doimiy ravishda olib boramiz, mutaxassislar ishtirokida o‘rganamiz. Bugungi kunda vazirlikka qarashli 234 ta obyekt ta’mirtalab holatda. Ularni hamma viloyatda uchratish mumkin. Albatta, bir yil ichida bularning barchasini rekonstruksiya qila olmaymiz. Lekin aytish kerakki, ta’mirlash ishlari uchun yildan-yilga davlat budjetidan ko‘proq mablag‘ ajratilyapti. 2021-yil uchun 73 milliard so‘m ajratilishi rejalashtirilgan. Biz bu mablag‘ni birinchi navbatda ta’mirga muhtoj obyektlar uchun sarflaymiz”, – dedi madaniyat vaziri o‘rinbosari.
Bosh prokuratura ma’lumotiga ko‘ra, 2020-yil davomida 45 ta noqonuniy huquqiy-normativ hujjatlarga protestlar keltirilgan. Qonun buzilishi holatlariga olib kelgan sabab va sharoitlarni yo‘qotishga qaratilgan 106 ta taqdimnoma kiritilgan, 31 nafar shaxs intizomiy va ma’muriy javobgarlikka tortilgan.
Izoh (0)