Shavkat Mirziyoyev 4-dekabr, juma kuni Rossiya sanoat va savdo vaziri Denis Manturov bilan muzokara olib borgandi. “Gazeta.uz”ning xabar berishicha, Prezident muzokarada “TAPOiCh” samolyotsozlik zavodining taqdiri muhokama qilinganini aytdi.
“Bugun biz sheriklarimiz bilan ‘TAPOiCh’ taqdiri, uning kelajagi haqida suhbatlashdik. Men asta-sekin sirlarni oshkor qilishni boshlayman, chunki mening ichimda ham alam bor. Dunyoda samolyotlar ishlab chiqaradigan sanoqli davlatlar bo‘lgan. Afsuski, biz uni o‘z qo‘llarimiz bilan yo‘q qildik. Ammo biz uni tiklash uchun hali ham ko‘p ishlarni amalga oshiramiz”, — degan davlat rahbari.
“Bizda aviasozlar, ‘TAPOiCh’ bor edi. Ularning barchasi tarixda qoldi, endi ular yo‘q. Qanday muhandislar, qanday yoshlar ishlagandi”, — deya kuyingan Prezident.
Eslatib o‘tamiz, Chkalov nomidagi Toshkent aviatsiya ishlab chiqarish birlashmasi 1941-yilda paydo bo‘lgan — urush boshlanishi bilan 1932-yilda Moskva yaqinidagi Ximki shahrida tashkil etilgan zavod Toshkentga evakuatsiya qilingan. Zavod so‘nggi samolyotlardan birini 2012-yilda ishlab chiqargan. Ayni paytda uning asosiy hududida Toshkent mexanika zavodi joylashgan.
Mavzuga doir: O‘zbekiston samolyotlar muzeyi: Yerga ko‘milgan osmon
Izoh (0)