Hashamatli qasrlar, xususiy samolyotlar, mashinalar, zargarlik buyumlari va qimmatbaho soatlar. Yengilmas bokschi Floyd Meyvezer millionlarini nimalarga sarflaydi?

Faoliyati davomida biror marta ham mag‘lubiyatga uchramagan bokschi Floyd Meyvezer (50-0) ushbu sport afsonasi bo‘lishdan tashqari, dunyoning eng boy sportchilaridan biri ham hisoblanadi. Hozirda u 42 yoshda, faoliyatini esa allaqachon yakunlagan. Pul masalasida unga yetadigani yo‘q, har xolda sportchilar orasida shunday. Biroq uni buning uchun tanqid qilish o‘ta noo‘rin ish bo‘ladi. Chunki bu pullarni u o‘zi mehnati orqali ishlab topgan. Tabiiyki, ko‘pchilikni uning bu pullarni nimalarga sarflashi qiziqtiradi. Quyida esa aynan ushbu savollarga javob berishga harakat qilamiz.

Meyvezerning uylari

Mayvezer butun hayoti davomida o‘z boyligini ko‘z-ko‘z qilishdan qo‘rqmagan. Amerikalik ko‘chmas mulk borasida umuman mablag‘ni ayamaydi. Uning Los-Anjeles, Las-Vegas va Mayamida uchta ulkan qasri bor.

Los-Anjelesdagi (Beverli-Hillzda) qarorgoh unga 25 million dollarga tushgan. Uyda oltita ulkan hashamatli yotoqxona mavjud.

Shuningdek, 225 dona sharobga mo‘ljallangan maxsus shkaf ham bor.

Bokschi 12 kishilik kinoteatrda vaqtini maroqli o‘tkazishi mumkin.

Meyvezerning Las-Vegasdagi (Nevada shtati) majmuasi uning so‘nggi xaridi bo‘lib, bu unga 10,35 million dollarga tushgan. Hashamatli qasrda 11 ta yotoqxona, 14 ta hammom, yopiq va ochiq hovuz, sport zali, sharob ombori, uzumzor va 2 ta yerosti garaj mavjud bo‘lib, unda chempionning ajoyib mashinalar to‘plami joylashgan. Meyvezer ko‘p vaqtini aynan Las-Vegasdagi uyida o‘tkazadi.

Bokschi 2015-yilda Mayamidagi dam olish mo‘ljallangan uyini 7 million dollarga sotib olgan. Biroq Meyvezer 465 kvadrat metrli bu uyda kamdan kam bo‘ladi. Bu yerda och va o‘ziga xos dizayn uslubini ko‘rish mumkin. Uyning tashqari qismi, ya’ni, hovlida basseyn va SPA ham mavjud.

Meyvezerning avtomobillari

Hech kimga sir emaski, Meyvezer mashinalarni juda yaxshi ko‘radi. Odatda u faqat oq yoki qora rangdagi mashinalarni xarid qiladi. Uning Los-Anjeles va Las-Vegasda uylarida deyarli barcha turdagi mashinalarni ko‘rish mumkin. Uning avtoulov kolleksiyasi, taxminan, 26,5 million dollarga baholanadi. Amerikalik tezkor mashinalarni, shu jumladan, Bugatti kabi qimmatbaho mashinalarni afzal biladi.

Los-Anjelesdagi qasrda bokschi faqat qora, Las-Vegasda esa oq rangdagi mashinalarni saqlaydi.

Meyvezer qiymati 4 million dollardan ziyodroq bo‘lgan Rolls-Royce seriyasiga egalik qiladi, shuningdek, uning 2,25 million dollarlik 4 ta Bugatti Veyron superkari ham bor.

Bundan tashqari, uning garajida Lamborghini Aventador (365 ming dollar) va Ferrari 488 (365 ming dollar) kabi kamtarona bo‘lmagan “toychoq”larni ham ko‘rish mumkin.

Meyvezerning Los-Anjelesdagi parkiga esa yaqinda 206 ming dollarlik Mercedes G63 AMG furgon ham qo‘shildi.

Meyvezerning samolyotlari

Ma’lumotlarga ko‘ra Meyvezer 3 ta xususiy samolyotga egalik qiladi, ulardan biri Air Mayweather deb nomlanadi. 66 million dollarlik Gulfstream G650, taxminan, 14 kishini sig‘dira oladi. Amerikalik uni 2018-yilda tug‘ilgan kuniga sovg‘a sifatida sotib olgan. Bokschi tez-tez bortda tushgan rasmlari bilan bo‘lishib turadi. Air Mayweather TMT logotipi — The Money Team va professional boksdagi 50:0 rekord ko‘rsatkichlari bilan bezalgan.

Zargarlik buyumlari va qimmatbaho soatlar

Ko‘p yillar davomida Meyvezer zargarlik buyumlarining anchayin keng bo‘lgan to‘plamini to‘plab qo‘ygan.

U 41 ta qimmatbaho soatlar egasi ekanligini ma’lum qilgandi. Uning kolleksiyasidagi eng qimmat soat, bu Jacob & Co kompaniyasining “Milliarderlar soati” hisoblanadi. Amerikalik ushbu matoh uchun, taxminan, 18,5 million dollar to‘lagan. Soat 239 zumraddan kesilgan olmoslar bilan jihozlangan, ularning har birining og‘irligi esa 3 karatni tashkil qiladi.

Meyvezer tez-tez zargarlik buyumlarini taqqan holda NBA o‘yinlariga tashrif buyurib turadi. Oltin va platina zanjirlar esa bokschi uchun unchalik ham og‘irlik qilmaydi.

Meyvezerni ko‘pincha pullari ko‘pligi tufayli “Money-Meyweather” (Money — ingliz tilidan tarjima qilinganda pul degan ma’noni bildiradi) deb ham atashadi.