Qor yog‘gan kunda Toshkent jamoat transporti talab darajasida ishlamadi. Mas’ullar avtobuslarni imkon qadar ko‘paytirishga va’da berdi

18-noyabr kuni Toshkent shahriga yog‘gan qordan keyin poytaxtdagi jamoat transporti faoliyatida qiyinchiliklar yuzaga keldi. Ijtimoiy tarmoqlarda jamoat transportining yetishmasligi va avtomobillar harakatining sekinligi sabab yuzaga kelgan tirbandliklarning foto va videolari tarqaldi.

Internet foydalanuvchilari avtobuslar aholining ehtiyojini qondira olmayotganidan norozi bo‘lib, turli postlar qoldirmoqda.

“Hurmatli Sherzod Musayev (“Toshshahartransxizmat” masofaviy nazorat va yo‘nalish tarmog‘ini ishlab chiqish boshqarmasi boshlig‘i — tahr.) ishga borish uchun bekatlarda tonggi avtobuslarni kutmagan ko‘rinadi. Xuddi uning boshlig‘i — Anvar Jo‘rayev kabi. Issiq mashinadan turib bekatlarda muzlab turgan yo‘lovchilarga miyig‘ida kulib qo‘yish ham mumkin…

Biz uzoq vaqt transport tizimida ishlaydigan odamlar bu ishni qila olishiga ishona olmadik. Ammo ma’lum bo‘lishicha, qila olishar ekan. Normal davlatlarda bu kabi holatdan so‘ng iste’foga chiqishadi. Bizda nima bo‘lar ekan?”, — deb yozadi Telegram’dagi “Ko dnu” kanali.

“Metropoliten — yaxshi. Avtobuslar — unchalik emas.

Monitoring bilan bog‘liq vaziyat bo‘lmaganida balki barchasini tushunish va kechirish mumkin bo‘lardi. Ob-havo haqida oldindan ma’lum edi va nima sababdan odamlar monitoring odamlarga har doimgidan ham ko‘proq kerak bo‘lganida undan mahrum qilindi — bu ham javobsiz qolmoqda”, — deyiladi yana bir postda.

Shu kabi muammolarni inobatga olib, “Toshshahartransxizmat” aksiyadorlik jamiyati tomonidan 19-noyabr kuni fuqarolarning shaxsiy transportlaridan foydalanmasliklarini tavsiya etgan holda, jamoat transporti (avtobuslar) sonini imkon qadar ko‘paytirish bo‘yicha tezkor choralar ko‘rmoqda.

19-noyabr poytaxt bo‘ylab harakatlanadigan avtobuslar soni va qaysi avtobus saroyidan nechta avtobus harakatlanishi haqida ma’lumotlar:

1. 1-Avtobus saroyi: 107 ta

• Katta sig‘imli: 46 ta;
• Kichkina sig‘imli: 59 ta.

2. 2-Avtobus saroyi: 121 ta

• Katta sig‘imli: 76;
• Kichkina sig‘imli: 45 ta.

3. 4-Avtobus saroyi: 104 ta

• Katta sig‘imli: 50 ta;
• Kichkina sig‘imli: 54 ta.

4. 5-Avtobus saroyi: 90 ta

• Katta sig‘imli: 35 ta;
• Kichkina sig‘imli: 55 ta.

5. 7-Avtobus saroyi: 118 ta

• Katta sig‘imli: 52 ta;
• Kichkina sig‘imli: 64 ta.

6. 8-Avtobus saroyi: 174 ta

• Katta sig‘imli: 90 ta;
• Kichkina sig‘imli: 84 ta.

7. 12-Avtobus saroyi: 133 ta

• Katta sig‘imli: 55 ta;
• Kichkina sig‘imli: 78 ta.

8. 18-Avtobus saroyi: 144 ta

• Katta sig‘imli: 66 ta;
• Kichkina sig‘imli: 78 ta.

Umumiy hisobda 991 ta avtobus yo‘nalishga chiqarilishi belgilangan.

Ta’kidlanishicha, avtobuslarning yo‘nalishga o‘z vaqtida kamchiliklarsiz, to‘liq chiqishini nazorat qilish maqsadida, “Toshshahartransxizmat” aksiyadorlik jamiyati tomonidan, har bir avtobus saroyiga jamiyatdan boshqaruv raisi hamda uning o‘rinbosarlari va tegishli mutaxassislarni jalb qilgan holda, bittadan mas’ul xodim biriktirilib, avtobuslarni yo‘nalishga to‘liq chiqarilishini qat’iy nazoratga olmoqda.

Avvalroq O‘zbekistonda 18-noyabr kuni boshlangan noqulay ob-havo sharoiti 20-noyabrga qadar davom etishi kutilayotgani to‘g‘risida xabar berilgandi.