Toshkent viloyati Yuqumli kasalliklar shifoxonasi mansabdor shaxslariga nisbatan Chirchiq shahar prokuraturasi tomonidan olib borilayotgan dastlabki tergov harakatlari ayblov xulosasi bilan tamomlanib, mazmunan ko‘rib chiqish uchun Jinoyat ishlari bo‘yicha Chirchiq shahar sudiga yuborildi. Bu haqda Bosh prokuratura “Daryo”ga xabar qildi.
Ma’lum bo‘lishicha, tergovda dastlabki e’lon qilingan ayblov to‘ldirilib, G.Yo‘ldosheva hamda yana 4 kishiga nisbatan Jinoyat kodeksining 167-moddasi 3-qismi “a” bandi (juda ko‘p miqdorda o‘zlashtirish yoki rastrata yo‘li bilan talon-toroj qilish), 209-moddasi 2-qismi “a” bandi (takroran yoki xavfli retsidivist tomonidan sodir etilgan mansab soxtakorligi), 25-167-moddasi 3-qismi “a” bandi, 207-moddasi 3-qismi “a” bandi (odam o‘lishiga sabab bo‘lgan mansabga sovuqqonlik bilan qarash) bilan ayb e’lon qilingan.
“Kun.uz”ning ma’lum qilishicha, G.Yo‘ldoshevaning advokati Xushnud Ahrorov uning himoyasi ostidagi shaxs e’lon qilingan ayblovlarga iqror emasligini, o‘zining aybsiz ekanligini va barcha e’tirozlarini sudda bayon etishini aytgan.
Jinoyat ishi bo‘yicha sud muhokamalari qachon boshlanishi hozircha ma’lum qilinmagan.
Eslatib o‘tamiz, koronavirusga chalingan bemor o‘limi va 250 million so‘m budjet mablag‘larini talon-toroj qilganlikda ayblanib qamoqqa olingan Toshkent viloyati bosh infeksionisti Guljahon Yo‘ldoshevaga nisbatan jinoyat ishi 2020-yil 11-avgustda Chirchiq shahar prokuraturasi tomonidan qo‘zg‘atilgan. 8-sentabrga kelib, ehtiyot chorasi sifatida ayblanuvchi qamoqqa olingan edi.
Uning qamoqqa olinishi jamoatchilik o‘rtasida keng muhokamalarga sabab bo‘ldi. Bir qator davlat va nodavlat tashkilotlarning rahbarlari, xususan, Senat raisi Tanzila Norboyeva, Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi o‘rinbosari, gender tenglikni ta’minlash masalalari bo‘yicha komissiya a’zosi Saida Mirziyoyeva mazkur hodisaga munosabat bildirib, prokuraturani shifokorga nisbatan qo‘llanilgan ehtiyot chorasi o‘zgartirishga chaqirgan.
Shundan so‘ng, Guljahon Yo‘ldosheva 6-oktabr kuni uy qamog‘iga o‘tkazilgandi.
Izoh (0)