Namangan viloyati Namangan shahrida tunda do‘kondan chiqqan qizga gap otgan yigitlarni yog‘och bita bilan urgan erkakka nisbatan jinoiy ish ochildi. Bu haqda IIV huzuridagi Tergov departamenti xabar bergan.
Qayd etilishicha, voqea 2020-yilning 3-noyabr kuni soat 01:00 da 40 yoshli O.M. Namangan shahar 5-kichik tumanda joylashgan do‘konda savdo qilayotganida, do‘kondan xarid qilib tashqariga chiqqan 25 yoshli S.A.ga (ayol) gap otgan yigitlar bilan janjallashgan. O.M. Matiz’dan turib S.A.ga tegajog‘lik qilgan J.U., M.T. va Y.S.ni do‘konda bo‘lgan yog‘och bita bilan qo‘rqitgan va Y.S.ning bosh qismiga urib, unga tan jarohati yetkazgan.
Dastlabki tibbiy ma’lumotnomada jabrlanuvchida bosh miya ochiq shikasti, bosh miyaning og‘ir darajali lat yeyishi, bosh miya chap yarim sharlari o‘tkir epidural gematomasi hisobiga ezilishi va boshqa jarohatlar borligi aniqlangan.
Mazkur holat yuzasidan Namangan shahar bo‘yicha IIO FMB 1-sonli IIB huzuridagi Tergov bo‘linmasi tomonidan O.M.ga nisbatan O‘zbekiston Respublikasi Jinoyat kodeksining 104-moddasi 2-qismi “e” bandi (bezorilik oqibatida qasddan badanga og‘ir shikast yetkazish) bilan jinoyat ishi qo‘zg‘atilib, u jinoyat ishida gumon qilinuvchi tariqasida ishda ishtirok etishga jalb qilingan.
Hozirda jinoyat ishi bo‘yicha dastlabki tergov harakatlari olib borilmoqda, deyiladi departament axborotida.
Eslatib o‘tamiz, oldinroq Namanganda ikki erkakni do‘pposlagan Gulsanam Alijonovaga nisbatan Jinoyat kodeksining 277-moddasi 3-qismi “g” bandi (jamoat tartibini saqlash vazifasini bajarib turgan hokimiyat vakili yoki jamoatchilik vakiliga yoxud bezorilik harakatlarining oldini olish chorasini ko‘rgan boshqa fuqarolarga qarshilik ko‘rsatib sodir etilgan bezorilik) bilan jinoyat ishi qo‘zg‘atilgani, keyinchalik ishi tugatilgani haqida xabarlar berilgan.
Izoh (0)