Taniqli aktrisa nafaqat o‘z vatanida, balki butun dunyo bo‘ylab mashhurlikka erishgan yulduzlardan biridir. Aktrisa kino olamidagi darajasidan tashqari dunyo go‘zali, mahoratli raqqosa, mehribon ona bo‘lish bilan birga, xayriya ishlarida ham muntazam ravishda ishtirok etib keladi. 1973-yil 1-noyabr sanasida tavallud topgan aktrisa kuni kecha 47 yoshini nishonladi.
Omadli chipta
Ayshvariya Ray hech qanday mubolag‘asiz Bollivudning g‘arbdagi eng taniqli vakillaridan biriga aylandi. Shuningdek, uning hayoti umuman boshqa yo‘sinda ketishi ham mumkin edi. Aksariyat aktyorlardan farqli o‘laroq uning sulolasida birorta ham taniqli inson bo‘lmagan va kino san’atiga tasodifan kirib kelgan. Bo‘lajak yulduz Hindistonning Karnataka shtatidagi Mangalor shahrida harbiy ofitser oilasida dunyoga kelgan. Ayshvariya Bombey, hozirgi Mumbay shahrida tahsil olgan. Maktabdagi bilimlarni yaxshi o‘zlashtirgan Ayshvariya arxitektor bo‘lishga qaror qilgan va Rachana Sansad kolleji imtihonini muvaffaqiyatli topshirgan. Ehtimol, bo‘sh vaqtida suratkashlik bilan shug‘ullanuvchi o‘qituvchilaridan biri unga o‘zini model sifatida sinab ko‘rishini taklif qilmaganida unga bunday ajoyib hayot nasib etmasmidi?! Shunday qilib Ayshvariyaning hayotida keskin burilish yuz berdi.
Ayshvariya yutuqlar sari olg‘a qadam tashlashni boshladi. 1991-yil Ford kompaniyasi tomonidan tashkil etilgan modellar tanlovida g‘olib bo‘ldi, bu esa uning suratlari Vogue jurnali sahifalaridan joy olishiga sabab bo‘ldi. 1993-yilda Ray Amir Xon va Maxima Chaudxari bilan birgalikda Pepsi reklamasida ishtirok etdi. Ushbu rolikdan Ayshvariya atigi ikkita jumla aytgan bo‘lsa-da, reklama ularni mashhurlik tomon yetakladi.
Biroq Ayshvariyani kelajakda kutib turgan omadi oldida buni yutuq deb hisoblamasa ham bo‘ladi. Yulduz modellik sohasida o‘zini namoyon qilib, go‘zallik tanlovlarida omadini sinab ko‘rishga qaror qildi. 1994-yil “Hindiston go‘zali”da Sushmita Senga yutqazib, ikkinchi o‘rinni egalladi. Shundan so‘ng Sen Filippinga, Ayshvariya esa “Dunyo go‘zali” tanlovi uchun Janubiy Afrikaga jo‘nab ketdi va ikki go‘zal ham o‘z yurtiga g‘oliblik toji bilan qaytdi.
Bollivud va Kann
Ayshvariya Ray “Dunyo go‘zali” unvoniga sazovor bo‘lishiga qaramay, mahalliy loyihalarda ham ish boshlaydi. Uning ilk debyuti tamil tilidagi “Iruvar” dramasi bo‘ldi, keyinchalik ushbu kartina Belgrad xalqaro kinofestivalida mukofotga sazovor bo‘ldi.
1999-yil “Qalbim senikidir, jonim” filmida Salmon Xon, 2000-yilda “Jo‘shqinlik” filmida Shohrux Xon bilan ham birgalikda rol ijro etdi. O‘sha vaqtda ikki aktyor ham Bollivudda mashhurlikka erishdi. Shuningdek, aktrisa nafaqat ijro mahorati, balki plastikasi uchun ham maqtovga sazovor bo‘ldi.
Ayshvariya Ray va “Bollivud qiroli” Shohrux Xon juftligi rejissorlar uchun ajoyib yangilik bo‘ldi. Ular yana birgalikda 2002-yil “Devdas” filmida suratga tushdi. Film sujeti bengallik yozuvchi Sarat Chandra Chattopadxay romani asosida yozilgan edi. “Devdas” filmi nafaqat Bollivudda, balki butun dunyo bo‘ylab momaqaldiroq kabi gumburladi. Time jurnali filmni “Avatar” va “Uzuklar hukmdori” kartinalari bilan birga ming yillikning eng yaxshi o‘nta filmi ro‘yxatiga kiritdi. Shuningdek, film 2002-yil Kann festivali sovrinlarining biriga nomzod bo‘ldi.
2010-yilga qadar aktrisa suratga tushish maydonchasida faol bo‘ldi. U uchun “Jodxa va Akbar” filmi ham muvaffaqiyat olib keldi. Oxirgi besh yillikda esa aktrisa Ritik Roshan bilan “Guzaarish” filmida ko‘rinish berdi.
Ray Bachchan
2010-yildan Ray shaxsiy hayoti tufayli kinodagi faoliyatiga tanaffus berdi. U endi oila va farzand tarbiyasi bilan band bo‘ldi. Shohrux Xon ekranlarda porlagunga qadar “Bollivud qiroli” unvoni egasi bo‘lgan Amitabh Bachchanning o‘g‘li unchalik taniqli bo‘lmasa-da, hurmatga sazovor inson – Abhishek Bachchan bilan Ayshvariya Ray turmush qurdi.
Juftlik 2000-yillarda “Haqiqiy tuyg‘ular” filmining suratga olish jarayonida tanishgan. 2007-yil 14-yanvar kuni Mumbayda yopiq marosimda turmush qurdi. Hikoya boshidagi Bollivuddan uzoq bo‘lgan harbiy oilada dunyoga kelgan qizaloq Ray hind kino olamidagi eng mashhur sulolaning bir qismiga aylandi. 2011-yil noyabr oyida ularning oilasida qiz tug‘ildi va unga Aaradxiya deb ism qo‘yildi.
Rayning o‘tmishi
Ayshvariya Ray dastlab Salmon Xon bilan uzoq muddat munosabatda bo‘lgan. Munosabatlar aktrisaning tashabbusi bilan tugatilgan. Sababi aktrisa sherigi tomonidan ruhiy va jismoniy zo‘ravonlikka uchraganini tan olgan.
Aktrisa bor e’tiborini farzandiga qaratgani uchunmi suratga olish ishlarida avvalgidek faol emas. Ammo ekranlarda ko‘rinish berib turibdi. Balki, u avvalgidek mashhurlik cho‘qqisiga chiqadigan filmlardagi kabi ijroni takrorlamas. Ammo endi u ko‘proq xayriya ishlari bilan band, boshqa yulduzlar qatorida mablag‘ yig‘ish konsertlarida ishtirok etmoqda.
Shuningdek, 2004-yilda muhtojlarga ko‘mak berish niyatida o‘z fondini tashkil etdi. Bundan tashqari aktrisa RETA tashkilotining a’zosi bo‘lib, 2012-yilda YUNEYDS tomonidan yaxshi niyat elchisi etib tayinlandi va OIV bilan kasallanishning oldini olishda ham yordam berib kelmoqda.
Izoh (0)