“Navbahor” klubining ichki ishlariga aralashgan va muxlislik reglamentini buzgan namanganlik ishqibozlar “qora ro‘yxat”ga kiritiladi

Namangan viloyati hokimi vazifasini bajaruvchi Shavkat Abdurazzoqov “Navbahor” jamoasining ayrim muxlislarini tanqid ostiga oldi va bundan buyon tartibsizliklar keltirib chiqargan ishqibozlar jazoga tortilishini ma’lum qildi.

“Muxlislarga shuni eslatmoqchimanki, ishqiboz reglament va qoidalarga asosan muxlislik qilishi, jamoaning ichki ishlariga umuman aralashmasligi lozim. Bundan buyon muxlislik qoidalarini buzganlar “qora ro‘yxat”ga olinadi hamda umuman stadionga kiritilmaydi.

Men ham yoshligimda futbolga qatnaganman hamda futbolni juda yaxshi tushunaman. Futbolchi ham inson, ayrim vaziyatlarda adashadi. Shunday holatlarda o‘yinchini himoya qilish o‘rniga ayrim muxlislar uni haqorat qiladi. Bu esa futbolchiga salbiy ta’sir ko‘rsatadi”, — deydi Abdurazzoqov.

Eslatib o‘tamiz, viloyat rahbari 7-oktabr kuni “Navbahor” qarorgohida yig‘ilish o‘tkazdi. Unda klubning strategiyasi butkul o‘zgarishi va endilikda jamoa faqat mahalliy yoshlarga tayanishi aytildi.