Qashqadaryolik senator tuman kengashi deputatini savodsizlikda aybladi

Qashqadaryo viloyatidan saylangan senator Abdurahim Erkayev Xalq deputatlari Qarshi tuman kengashi deputati Feruza Ahmedovani savodsizlikda aybladi. Bu haqda Qarshi shahridagi Jurnalistlar uyida bo‘lib o‘tgan tadbirda ma’lum qilindi, deya xabar berdi “Daryo” muxbiri.

Ma’lumot berilishicha, viloyatdagi Jurnalistlar uyida Oliy Majlis Senatining Sud-huquq masalalari va korrupsiyaga qarshi kurashish qo‘mitasi rais o‘rinbosari Shuhrat Cho‘lliyev boshchiligidagi ishchi guruh jurnalist va blogerlar bilan majburiy mehnat masalalari xususida suhbatlashgan.

Tadbirda so‘z olgan Oliy Majlis Senati a’zosi Abdurahim Erkayev Qarshi tuman hokimligi va Sulton Tex Group o‘rtasidagi mojaroni esga olib, Qarshi tuman Ma’muriy sudi qarori Xalq deputatlari Qarshi tuman kengashining sessiyasida muhokamaga qo‘yilgani haqidagi voqeaga to‘xtalgan.

“Ko‘pchilik fermerlar klasterdan jabr ko‘rgan ekan. Xalq deputatlari Qarshi tuman kengashi sessiyasiga ishtirok etib, klasterni himoya qilmoqchi edik. Ammo klasterning o‘zi aybdorligini bildik”, — dedi senator Abdurahim Erkayev.

Senator “Daryo” muxbirining “Senator sifatida Xalq deputatlari Qarshi tuman kengashining sessiyasida ishtirok etib, tuman Kengashi deputatlari bilan birgalikda sud qarorini muhokama qilganliklaringizni qanday izohlaysiz. Sud qarorini deputat va senatorlar muhokama qilishi qanchalik to‘g‘ri?” degan savoliga “O‘sha kungi sessiyada sud qarori muhokama qilinmagan” deya javob qaytardi va deputat Feruza Ahmedovani savodsizlikda aybladi.

“Bir opaning savodsizligi va farosatsizligi bilan aytilgan gapi qolganlarga soya tashlamasligi kerak. Qolaversa, sessiyada sud qarori muhokama qilinmagan. Sessiyada klaster va fermerlar o‘rtasidagi munosabat muhokama qilingandi. Tuman hokimligi axborot xizmati ham bu haqda noto‘g‘ri ma’lumot tarqatgan”, — dedi senator.

Eslatib o‘tamiz, Qarshi tuman hokimligi axborot xizmatining 2020-yil 13-iyundagi xabariga ko‘ra, Xalq deputatlari tuman kengashining oltinchi chaqiriq, o‘ninchi sessiyasida tuman hokimi Maqsuda Mustafoyeva boshchiligidagi deputatlar Sulton Tex Group ishi bo‘yicha Qarshi tuman Ma’muriy sudi qarorini muhokama qilgani xabar berilgandi. Sessiyada, shuningdek, deputatlar jurnalistlar va ijtimoiy tarmoq foydalanuvchilarining tanobini tortib qo‘yish masalasini ham ko‘rib chiqqani yozilgandi. Hokimlik axborot xizmati keyinchalik mazkur xabardan aynan shu qismini o‘chirgandi.

Deputat Feruza Ahmedova esa ularga bu borada ko‘plab murojaatlar tushgani bois tuman kengashi deputatlari sud qarorini muhokama qilishga haqli ekanligini bildirib, “Qaror qanday qilib O‘zbekiston Respublikasi nomidan chiqar ekan? O‘zimizning Qarshi tuman Ma’muriy sudi ko‘rib chiqqan-ku”, — degandi. Deputat Dilorom Tilakova sessiyada ishtirok etgan bo‘lsa-da, sessiya paytida xonaga kirib-chiqib yurgani uchun masala mohiyatini unchalik ham tushunmaganini bildirgandi.