Farg‘onada Labo’ni hujjatlarsiz boshqargan maktab o‘quvchisi traktor tirkamasiga urildi

Farg‘ona viloyatida tegishli hujjatlari bo‘lmagan 9-sinf o‘quvchisi boshqargan Labo avtomobili qarama-qarshi yo‘nalishda kelayotgan traktor tirkamasiga borib urilib, yo‘l-transport hodisasi sodir bo‘lgan, deya xabar beradi YHXBB.

Qayd etilishicha, 2020-yil 14-sentabr kuni soat 13:45 larda Farg‘ona viloyatining Oltiariq tumanida “Tinchlik shaharcha” MFY hududidan o‘tgan 4R -148B avtomobil yo‘lining 5-kilometrida Bag‘dod tumani Chuvalachi qishlog‘ida yashovchi 2004-yilda tug‘ilgan Bag‘dod tumani 22-umumta’lim maktabining 9-sinf o‘quvchisi Oltiariq tumani “Tinchlik shaharchasi” MFYda yashovchi 1970-yilda tug‘ilgan fuqaroga tegishli davlat raqam belgisi 40R988GA bo‘lgan Labo rusumli avtomobilni tegishli hujjatlarsiz boshqarib ketayotib tajribasizligi sababli rul boshqaruvini yo‘qotgan.

Natijada avtomashina qarama-qarshi yo‘nalishga otib ketib, shu yo‘nalishda harakatlanib kelayotgan Oltiariq tumani “Bo‘ston” MFY yashovchi 1983-yilda tug‘ilgan Rahmatjon O‘rinboyev boshqaruvidagi davlat raqam belgisi 40 300SA bo‘lgan “T-28H4” rusumli traktor tirkamasiga urilib, YTH sodir qilgan.

“O‘zimning yo‘limda kelayotgandim. Orqani ko‘rsatuvchi oynadan mashina tirkamaga kelib urilganini ko‘rdim”, – deydi traktor haydovchisi.

Sodir etilgan YTH oqibatida Labo avtomashinasi boshqaruvida bo‘lgan voyaga yetmagan maktab o‘quvchisi olgan tan jarohatlari tufayli Oltiariq tumani markaziy shifoxonasiga yotqizilgan.

“Mazkur YTH shu kuni voqea sodir bo‘lgan joyning o‘zida mahalla fuqarolari, yoshlar va boshqalar ishtirokida muhokama qilinib, kelgusida bu kabi holatlarning oldini olish borasida tavsiyalar berildi”, – deyiladi xabarda.