O‘zbekistonda 16-avgust kuni 628 kishida koronavirus aniqlandi. Bu oxirgi 3 haftadagi eng past ko‘rsatkich

O‘zbekistonda 15-avgust soat 23:30 dan 16-avgust soat 23:30 gacha koronavirus yuqtirib olish bilan bog‘liq 628 ta holat qayd etildi. Bu oxirgi 21 kun ichidagi eng past ko‘rsatkich hisoblanadi. Yangi holatlardan so‘ng O‘zbekistonda koronavirusga chalinganlar soni 35329 nafarga yetdi.

Yangi kasallanish holatlari

Yangi kasallangan 628 kishining barchasi koronavirusga chalingan bemorlar bilan muloqotda bo‘lganligi sababli namuna olingan fuqarolar orasida aniqlangan:

• Toshkent shahrida — 382 nafar;
• Toshkent viloyatida — 169 nafar;
• Samarqand viloyatida — 41 nafar;
• Buxoro viloyatida — 13 nafar;
• Qoraqalpog‘iston Respublikasida — 10 nafar;
• Namangan viloyatida — 5 nafar;
• Andijon viloyatida — 3 nafar;
• Farg‘ona viloyatida — 3 nafar;
• Xorazm viloyatida — 2 nafar.

Kun davomida 9 ta hududda koronavirus yuqtirib olish holati qayd etildi.

Toshkent shahrida 382 kishida koronavirus aniqlandi. Avgust oyining ortda qolgan 16 kuni ichida Toshkentda eng kam kasallik aniqlangan kunda (2-avgust) 325 kishida, eng ko‘p kasallik aniqlangan kunda (9-avgust) 509 kishida COVID-19 qayd etildi. 1—16-avgust oralig‘ida poytaxtda (karantin zonasida aniqlangan holatlarni hisobga olmasa) 6761 ta yangi holat aniqlandi.

Toshkent viloyatida 169 kishida koronavirus aniqlandi. Viloyatda 23-iyuldan boshlab har kuni kasallikka chalinish holatlari qayd etilmoqda, 26-iyuldan beri esa har kuni koronavirusga chalinganlar soni 100 nafardan oshmoqda (ikki marta 200 tadan ham oshdi). Avgust oyining 15 kuni ichida Toshkent viloyatida (karantin zonasida aniqlangan holatlarni hisobga olmasa) 2477 kishida koronavirus aniqlandi.

17-iyuldan boshlab Sog‘liqni saqlash vazirligi Toshkent viloyatining ko‘rsatkichlarini Toshkent shahridan alohida bera boshlagandi. O‘shanda viloyatda 1678 nafar bemor bor edi, butun O‘zbekistonda koronavirusga chalinish holatlarining 10,75 foizi Toshkent viloyatiga to‘g‘ri kelardi. Bir oy ichida Toshkent viloyatida kasallikka chalinganlar 3 baravardan ham oshib ketdi. Hozirda viloyatda 5472 nafar bemor bor, bu O‘zbekiston bo‘yicha virusga chalinganlarning 15,5 foiziga teng.

Samarqand viloyatida 41 kishida COVID-19 aniqlandi. Yakuniga yetgan haftada Samarqand har kuni yangi bemorlar ro‘yxatga olindi, bu kunlarning oltitasida viloyat kunlik kasallanishlar soni bo‘yicha Toshkent shahri va viloyatidan so‘ng uchinchi natijani qayd etdi. Bemorlarning umumiy soni bo‘yicha ham dastlabki uchlikning ketma-ketligi aynan shundaydir. Samarqand uchun avgust oyi eng ko‘p kasallanish holatlari qayd etilgan oy bo‘ldi. 16 kun ichida viloyatda 532 kishida kasallik aniqlandi. Butun iyul oyida Samarqandda 487 kishida COVID-19 qayd etilgandi. Viloyatda kasallik yuqtirganlarning umumiy soni hozirda 1470 nafarni tashkil etadi. Taqqoslash uchun, Samarqandga qo‘shni Jizzax viloyatida bundan roppa-rosa 10 baravar kam bemor aniqlangan.

Buxoro viloyatida 13 kishida koronavirus qayd etildi. Viloyatda 12-avgustdan beri endi yangi holatlar ro‘yxatga olindi. Avgust oyida Buxoroda koronavirusga chalinish holatlari 186 taga ko‘paydi, bu viloyatdagi jami kasallanish holatlarining 18 foiziga tengdir. Koronavirus yuqtirib olganlar orasida Buxoro viloyat hokimi vazifasini bajaruvchi Karim Kamolov ham bor, unda 25-iyul kuni koronavirus aniqlangan, hozirda u Toshkentda davolanmoqda.

Qoraqalpog‘iston Respublikasida 10 kishida COVID-19 aniqlandi. Avgust oyida Qoraqalpog‘istonda jami 82 kishida koronavirus aniqlandi. Bu Respublikadagi jami kasallanish holatlarining 18,7 foiziga tengdir.

Namangan viloyatida 5 kishida koronavirus aniqlanib, kasallanganlar soni 825 nafarga yetdi. Ushbu beshta holat haqida SSV 16-avgust soat 10:00 da xabar berdi, ammo Namkoronavirusinfo kanali 15-avgust soat 17:00 holatiga ko‘ra bemorlar soni 5 nafarga oshib, 825 nafarga yetganini ma’lum qilgandi.

Andijon viloyatida 3 kishida koronavirus qayd etildi. Viloyatda bir oy ichida (17-iyuldan beri) faqat 3 marta — 25-iyul, 8-avgust va 15-avgust kunlari yangi kasallanish holatlari aniqlanmadi. Hozir Andijonda koronavirusga chalinganlar soni 1143 nafarga yetgan. Bu vodiyning qolgan ikki viloyati — Namangan (825 ta holat) va Farg‘ona (310) viloyatlaridagi umumiy kasallanganlar sonidan (1135) ham ko‘p deganidir.

Farg‘ona viloyatida 3 kishida koronavirus aniqlandi. Farg‘onada koronavirusga chalinganlar soni 310 nafarga yetdi. Ushbu holatlarning 56 tasi yoki 19 foizi avgustda aniqlandi.

Xorazm viloyatida 2 kishida COVID-19 qayd etildi. Ketma-ket uchinchi kun Xorazmda yangi bemorlar ro‘yxatga olinmoqda. Bunaqasi viloyatda yoz oyida hech ham kuzatilmagan (“Daryo” koronavirus bemorlari bo‘yicha kunlik hisobotlarni 1-iyundan boshlagandi).

O‘lim holatlari va ahvoli og‘ir bemorlar

SSV Toshkent shahrida 4 nafar, Buxoro va Toshkent viloyatlarida 1 nafardan, jami 6 nafar koronavirusga chalingan bemor vafot etganini xabar berdi. SSV 12—15-avgust kunlar har kuni 5 nafardan bemor vafot etayotgani haqida xabar bergandi. O‘limlar soni yana 6 taga chiqdi.

Birinchi o‘lim. Toshkent shahri Shayxontohur tumanida yashagan 66 yoshli M.X. ismli ayol vafot etgan.

Ikkinchi o‘lim. Toshkent shahri Chilonzor tumanida yashagan 71 yoshli Z.M. ismli erkak vafot etgan.

Uchinchi o‘lim. Toshkent viloyati Zangiota tumanida yashagan 64 yoshli K.N. ismli erkak vafot etgan. SSV Toshkent viloyatida 3-avgustdan beri 15 kishi vafot etgani haqida xabar berdi. Hozirda viloyatlar o‘limlar soni SSV hisobi bo‘yicha 26 taga yetgan.

To‘rtinchi o‘lim. Toshkent shahri Uchtepa tumanida yashagan 73 yoshli N.Q. ismli erkak vafot etgan.

Beshinchi o‘lim. SSV Buxoro viloyatining Shofirkon tumanida yashagan 51 yoshli G‘.J. ismli erkak vafot etganini xabar qildi. Ma’lum bo‘lishicha, vafot etgan erkak Shofirkon tumani IIB Yo‘l harakati xavfsizligi guruhi davlat YHXX katta inspektori mayor Jumayev G‘ofurjon Xolmurodovichdir.

O‘zbekiston Respublikasi IIV Yo‘l harakati xavfsizligi bosh boshqarmasi rahbariyati va shaxsiy tarkibi 16-avgust kuni G‘ofurjon Jumayevning vafoti munosabati bilan marhumning qarindosh va yaqinlariga chuqur ta’ziya izhor etgandi.

Oltinchi o‘lim. Toshkent shahri Chilonzor tumanida yashagan 68 yoshli J.S. ismli erkak vafot etgan.

Taniqli rejissor Sarvar Karimov ham 17-iyul kuni otasi koronavirus infeksiyasidan vafot etgani, ammo unga tashxis qo‘yilmaganini ma’lum qilgandi. Rejissorning o‘zi va uning boshqa oila a’zolarida koronavirus tasdiqlangan. Shuningdek, 26-iyul kuni bosh vazir o‘rinbosari Aziz Abduhakimov 24-iyul kuni Samarqanddagi Ipak yo‘li xalqaro turizm universitetining 33 yoshli magistranti O‘tkir Temirov kasallikdan vafot etganini aytgan. Ma’lum bo‘lishicha, marhum o‘zida COVID-19’ning barcha belgilari bo‘lsa-da, test ham topshira olmagan, kasalxonaga ham yota olmagan. Qoraqalpog‘istonning Taxtako‘pir tumani shifoxonasining 32 yoshli tez tibbiy yordam hamshirasi Aliya Jiyemuratova 28-iyul kuni koronavirusdan vafot etgani haqida “Makan.uz” xabar tarqatdi.Ayni paytda tibbiyot muassasalarida davolanayotgan 4124 nafar bemordan 813 nafari og‘ir, 234 nafari esa o‘ta og‘ir ahvolda. Ahvoli og‘ir va o‘ta og‘ir bemorlarning umumiy soni 4 kundan buyon kamaymoqda: 12-avgust kuni 1785 kishining ahvoli og‘ir bo‘lgan bo‘lsa, 13-avgustda 1740, 14-avgustda 1651, 15-avgust kuni 1306, endi esa 1047 nafar bemorning ahvoli og‘ir. Bu so‘nggi 10 kun ichidagi eng past ko‘rsatkich. Hozirda davolanayotgan bemorlarning 25 foizi yoki boshqacha aytganda har 4 nafar bemordan 1 nafarining ahvoli og‘ir bo‘lib turibdi.

Kasallikdan davolanish

16-avgust kuni O‘zbekistonning 10 ta hududida 930 kishi koronavirusdan sog‘aydi. 11-avgustdan 15-avgustgacha har kuni 1000 nafardan ortiq bemor tuzalayotgandi, 12-avgust kunidagi 1569 nafar bemorning sog‘ayishi hozircha rekord bo‘lib turibdi.

Yangi tuzalganlarning

• 625 nafari Toshkent shahrida;
• 216 nafari Toshkent viloyatida;
• 31 nafari Samarqand viloyatida;
• 15 nafari Buxoro viloyatida;
• 12 nafari Qoraqalpog‘iston Respublikasida;
• 11 nafari Sirdaryo viloyatida;
• 8 nafari Navoiy viloyatida;
• 5 nafari Andijon viloyatida;
• 4 nafari Qashqadaryo viloyatida;
• 3 nafari Farg‘ona viloyatida kasallikdan forig‘ bo‘ldi.

SSV ushbu bemorlar statsionar va uy sharoitida davolanganini aytgan. Biroq ularning qanchasi uy sharoitida, qanchasi statsionar sharoitda davolanganiga aniqlik kiritilmagan.

Ma’lumot uchun, O‘zbekistonda koronavirus epidemiyasi sabab sog‘liqni saqlash tizimiga tushayotgan yuklamani bir qadar yengillatish maqsadida 5-iyuldan boshlab koronavirus infeksiyasi alomatsiz kechayotgan bemorlarga uy sharoitida davolanishga ruxsat berilgan, ushbu yo‘nalishda yo‘riqnoma va eslatmalar ham e’lon qilingan.

Biroq Sog‘liqni saqlash vazirligi koronavirusga chalinganlarga doir axborotlarida yangi bemorlarning qanchasida kasallik alomatsiz (simptomsiz) kechayotganiga aniqlik kiritmayapti, shu boisdan ayni vaqtda koronavirusdan davolanayotgan bemorlarning qanchasi kasalxonalarda qolayotgani, qanchasi uy sharoitida davolanayotgani ma’lum emas.

Hozirda kasallik qayd etilgan jami 35329 nafar bemordan 30973 nafari sog‘ayib, davolanish ko‘rsatkichi 87 foizni tashkil etmoqda. Davolanish ko‘rsatkichi bo‘yicha ketma-ket uchinchi kun rekord yangilanmoqda.

Sog‘liqni saqlash vazirligi ma’lumotlari bo‘yicha ayni paytda 4124 nafar bemor COVID-19’dan davolanmoqda. 29-iyul kuni bemorlar soni 9500 dan ortiq edi. 30-iyuldan boshlab davolanayotgan bemorlar soni kamaya boshladi. Eslatib o‘tamiz, 10-iyuldan O‘zbekistonning barcha hududlari “qizil” hududga tenglashtirilib, karantin cheklovlari kuchaytirilgandi. 9-iyul soat 23:30 holatiga ko‘ra esa koronavirusdan davolanayotganlar soni 4226 nafarni tashkil etgandi. Bu davolanishdagi bemorlar soni karantin cheklovlari kuchaytirilishidan avvalgi ko‘rsatkichga tushganini anglatadi.

Hozirda eng ko‘p bemor Toshkent shahrida davolanmoqda — 3044 nafar. Farg‘onada 5, Jizzaxda 9, Qashqadaryoda 18, Navoiyda 20, Surxondaryoda 27, Xorazmda 28, Qoraqalpog‘istonda 33, Sirdaryoda 35, Namanganda 45, Andijonda 45, Buxoroda 74, Samarqandda 148 va Toshkent viloyatida 593 nafar bemor qoldi.