O‘zbekistonda koronavirusga qarshi kurash uchun zaxira yaratish maqsadida davlat budjeti xarajatlari maqbullashtiriladi

Vazirlar Mahkamasining “Koronavirus infeksiyasiga qarshi kurashish uchun zaxira yaratish maqsadida 2020-yildagi O‘zbekiston Respublikasining davlat budjeti xarajatlarini maqbullashtirish to‘g‘risida”gi qarori loyihasi muhokamaga qo‘yildi.

Vazirlik va idoralar, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklarining:

• budjet tashkilotlarida (tibbiyot, tibbiy-ijtimoiy muassasalari, mehribonlik uylaridan hamda mehnatga haq to‘lashning 1—3-razryadlari qo‘llaniladigan xodimlardan tashqari) ishlaydigan xodimlarga rejalashtirilgan moddiy rag‘batlantirish maxsus jamg‘armasi hamda direktor jamg‘armasi mablag‘lari hisobidan to‘lovlar hisoblanishini 2021-yilning 1-yanvariga qadar to‘xtatib turish;
• O‘zbekiston respublika budjeti xarajatlarini maqbullashtirish;
• Qoraqalpog‘iston Respublikasi budjeti, viloyatlar va Toshkent shahri budjetlari xarajatlarini maqbullashtirish;
• O‘zbekiston ijtimoiy va ishlab chiqarish infratuzilmasini rivojlantirish dasturida ko‘zda tutilgan xarajatlarni maqbullashtirish to‘g‘risidagi takliflariga rozilik beriladi.

Moliya vazirligi huzuridagi Inqirozga qarshi kurashish jamg‘armasi mablag‘lari hisobidan amalga oshirilishi rejalashtirilgan quyidagi xarajatlar:

• 2020-yilga qo‘shimcha ijtimoiy va infratuzilma loyihalarini amalga oshirish uchun yo‘naltirilishi rejalashtirilgan mablag‘larni;
• yer maydonlarini foydalanishga kiritish uchun tuman budjetlariga ajratilgan mablag‘lar hisobidan 100 milliard so‘mini;
• O‘zbekiston fermer, dehqon xo‘jaliklari va tomorqa yer egalarini qo‘llab-quvvatlash jamg‘armasiga o‘tkazilishi rejalashtirilgan 100 milliard so‘m mablag‘dan 50 milliard so‘m maqbullashtiriladi.

Vazirlar Mahkamasining 2020-yil 16-apreldagi 232-sonli “2020-yil uchun O‘zbekiston Respublikasi Davlat budjetining barqarorligini ta’minlash va xarajatlarini maqbullashtirish bo‘yicha qo‘shimcha chora-tadbirlar to‘g‘risida”gi qaroriga muvofiq, Qoraqalpog‘iston Respublikasi budjeti, viloyatlar va Toshkent shahri mahalliy budjetlarining tasdiqlangan daromadlar prognozining bajarilmasligi hisobiga xarajatlarning maqbullashtirilgan qismi respublika budjetiga yo‘naltiriladi.

Maqbullashtirilgan mablag‘lar kelgusida koronavirus infeksiyasiga qarshi kurashish chora-tadbirlariga yo‘naltirish uchun Moliya vazirligi huzuridagi Inqirozga qarshi kurashish jamg‘armasiga yo‘naltiriladi.

Bunda, Qoraqalpog‘iston Respublikasi budjeti, viloyatlar va Toshkent shahri mahalliy budjetlaridan maqbullashtirilgan mablag‘lar Moliya vazirligi huzuridagi Inqirozga qarshi kurashish jamg‘armasiga yo‘naltirish uchun respublika budjetiga yo‘naltiriladi.

Avvalroq O‘zbekistonda davlat budjeti daromadlari qanday soliq turlari hisobiga shakllangani ma’lum qilingan edi. Qayd etilishicha, davlat budjeti QQS,  foyda solig‘i, jismoniy shaxslardan olinadigan daromad solig‘i, yer qa’ridan foydalanganlik uchun soliq va aksiz solig‘i hisobiga shakllantirilgan.