PSJ hujumchisi Kilian Mbappe Fransiya Kubogi finalidan o‘rin olgan “Sent-Etyenn”ga qarshi bahsda (1:0) jarohat oldi.
Uchrashuvning 27-daqiqasida “Sent-Etyenn” futbolchisi Loik Perren o‘ta qo‘pol qoida buzish bilan Mbappeni to‘xtatib qoldi. Natijada 21 yoshli futbolchi o‘yinni davom ettira olmadi va maydonni tark etdi.
Ushbu to‘qnashuvdan keyin har ikki jamoa vakillari o‘rtasida ommaviy tortishuv boshlanib ketdi. Hakam videotakrorlardan so‘ng Perrenga to‘g‘ridan to‘g‘ri qizil kartochka ko‘rsatdi.
Biroz vaqt o‘tib Mbappe hassaga tayangan holda zaxira o‘rindig‘iga qaytdi va jamoasi bilan sovrinni nishonladi.
PSJ futbolchining jarohati borasida hali rasmiy ma’lumot bermadi. Dastlabki taxminlarga ko‘ra, Kilian jiddiy jarohatdan qutulib qolgan. Yakuniy xulosalar tibbiy ko‘rikdan keyin ma’lum bo‘ladi.
Mazkur o‘yinda PSJ Neymarning yagona goli evaziga g‘alaba qozondi va o‘z tarixida 13 marta Fransiya Kubogiga ega chiqdi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)