Checheniston davlat xizmatchilarining mahalliy “Grozniy” telekanalining ijtimoiy tarmoqlardagi sahifalariga obuna bo‘lishi majburiy deb belgilab qo‘yildi. Bu haqda respublika rahbari Ramzan Qodirov Vedensk tumanidagi Xoy qishlog‘ida o‘tgan yig‘ilishda topshiriq bergan, deya xabar bergan Meduza.
“Bir narsani tushunmayman, odam qanaqasiga Instagram’da sahifasiga ega bo‘lishi, ammo ChDTRK “Grozniy” telekanalining sahifasiga obuna bo‘lmasligi mumkin. Barcha axborotni shu yerdan olish kerak. Vatanidagi vaziyat, qanday o‘zgarishlar bo‘layotgani, islohotlar, qarorlar qabul qilinayotgani bilan qiziqmaydigan davlat xodimi, xizmatchisi o‘z lavozimiga loyiq emas. Agar uning bu bilan ishi bo‘lmasa, uni nafaqat xodim, tanlagan yo‘limizda bizga do‘st odam deyish qiyin bo‘ladi. Agar YouTube, “VKontakte” va boshqa ijtimoiy tarmoqlarda “Grozniy” telekanalining sahifalarini kuzatmasa, demak u bizning jamiyat uchun xavfli odam”, — degan Ramzan Qodirov.
“Grozniy” telekanalining YouTube’dagi sahifasida xabar qilinishicha, Qodirov Xoy qishlog‘idagi yig‘ilishda Checheniston atrofida salbiy axborotlar to‘planayotgani va bu orqali hududdagi vaziyatni beqarorlashtirishga urinish holatlari yuzaga kelishi mumkinligiga e’tibor qaratgan.
“Yolg‘on ma’lumotlar bilan bizni dog‘da qoldirmoqchi bo‘layotgan dushmanlarga munosib qarshilik ko‘rsatishimiz kerak. Bu nafaqat hukumatning balki OAVning ham vazifalariga kiradi. Menimcha yolg‘onni haqiqat bilan har qanday uslubda yanchib tashlash har bir kishining fuqarolik burchi!” — deya Qodirov so‘zlaridan iqtibos keltirgan mahalliy telekanal.
Mavzuga doir:
- Checheniston rahbari Ramzan Qodirov Putinni umrbod prezidentlikka saylashni taklif qildi
- “Mening testim antitana aniqlamadi”. Ramzan Qodirov koronavirusga chalinmaganini ma’lum qildi
- “Kimdir mening topshirig‘im bilan harakat qilsa, u buni bajaradi”. Ramzan Qodirov gruziyalik jurnalistga uyushtirilgan hujum haqida
Izoh (0)