Xitoyning Qozog‘istondagi elchixonasi o‘z saytida mamlakatda bo‘lib turgan xitoylik fuqarolarni respublika hududida pnevmoniyaning xavfli turini keltirib chiqaradigan yangi infeksiya tarqalganidan ogohlantirdi, deb xabar bermoqda “Interfaks”.
Elchixonaning mahalliy OAVlarga tayanib ta’kidlashicha, iyun o‘rtalaridan boshlab Atirau, Aqto‘be va Chimkent viloyatlarida pnevmoniyaning ushbu turi bilan kasallanish “sezilarli darajada oshdi”. Shu bilan birga, “yangi va hali o‘rganilmagan turi”dan o‘lim darajasi COVID-19’ga qaraganda ancha yuqori ekanligi aytilgan.
Shuningdek, elchixona bugungi kunda Qozog‘istonning yuqoridagi viloyatlarida qariyb 500 kishi kasallangani, ularning 30 nafarining ahvoli og‘ir deb baholanayotganini qayd etgan. 2020-yilning birinchi yarmida Qozog‘istonda 1772 kishi pnevmoniyadan vafot etgani, iyun oyining o‘zida 628 kishi, shu jumladan, Xitoy fuqarolari vafot etgani va virusning ushbu turini o‘rganish hali aniq natijalarni bermagani qo‘shimcha qilingan.
Tengrinews’ning ma’lum qilishicha, Qozog‘iston Sog‘liqni saqlash vazirligi Xitoyning bir qator OAVlarida qayd etilgan bunday xabarlarni rad etdi. “Qozog‘iston respublikasi Sog‘liqni saqlash vazirligi ushbu ma’lumot haqiqatga zidligini rasman e’lon qiladi”, — deyiladi vazirlik bayonotida.
Avvalroq Qozog‘istonning Olmaota shahri rasmiylari shaharda yaqin kunlarda kuzatilayotgan o‘tkir respirator virusli infeksiyalar (O‘RVI) va pnevmoniyaga chalinganlar soni ortganini epidemiya deb qarayotgani xabar berilgan edi. Olmaota viloyati hokimi o‘rinbosari va viloyat bosh sanitariya vrachi pnevmoniyadan vafot etgan.
Qozog‘istoda koronavirusga chalinganlar soni 53 021 kishiga yetgan. Hozirga qadar 35 137 kishi sog‘aygan, 264 kishi virus qurboniga aylangan.
Butunjahon shifokorlar kasaba uyushmasi (WMA) sobiq rahbari Leonid Eydelman kasallikning ikkinchi to‘lqiniga jiddiy tayyorgarlik ko‘rish kerakligini, chunki u vaqtda COVID-19 O‘RVI epidemiyasi davrida parallel ravishda tarqalishi mumkinligini aytib o‘tgandi.
Izoh (0)