Texasdagi avtosalonlarning birida 1988-yilda ishlab chiqarilgan Mercury Sable Convertible kabrioleti sotuvga qo‘yildi. Ford-Taurus’ning egizak-modeli hisoblanuvchi Sable Convertible faqatgina sedan va universal ko‘rinishda ishlab chiqarilgan, deb xabar beradi Motor.
Kabriolet Michigan shtatidagi C&C (Cars and Concepts) firmasi tomonidan yaratilgan. Kompaniyaga Hurst Performance vitse-prezidenti Richard Kreysler tomonidan asos solingan bo‘lib, u seriyali mashinalarni qayta ishlash va ochiq avtomobillar yaratishga ixtisoslashgan.
Kompaniya tor doiralarda katta mashhurlikka erishgan: Chevroler Camaro/Pontiac Firebird, uchinchi avlod Ford Mustang uchun yechiluvchi “T-top” tomlar, uchinchi avlod Chevrolet Corvette’ning yukxona qismini, Chrysler 600 va LeBaron uchun yig‘iluvchi tomlar, shuningdek, seriyali Ford Mustang Convertible modelining yumshoq tepa qismini ishlab chiqargan.
Mercury Sable Convertible konsepti mualliflari ushbu mashinani qattiq va to‘liq avtomatik mexanizm yordamida yig‘iluvchi tom qismiga ega birinchi kabriolet deb ataydi.
Mercury Sable’ni kabrioletga aylantirish uchun C&C mutaxassislari juda katta hajmdagi ishlarni amalga oshirgan: po‘lat tom nafaqat matoliga almashtirilgan, balki kuzov kuchaytirilgan, orginal yon qismlari to‘liq qayta tayyorlangan va eshiklar 30 santimetrga uzaytirilgan.
Mashinaga 3,0 litrli Vulcan oilasiga kiruvchi V6 motori o‘rnatilgan bo‘lib, u to‘rt pog‘onali avtomat AXOD uzatmalar qutisi yordamida boshqariladi.
Uzoq yillardan beri Texasda saqlanib kelayotgan model 15 771 kilometr yo‘l bosgan bo‘lib, mashina egasi uni 21 900 dollarga sotishga tayyor.
Avvalroq AQShning Arkanzas shtatida 1990-yilda ishlab chiqarilgan qizil rangli Ford Mustang kabrioleti 35 ming dollarga sotilgani to‘g‘risida xabar berilgandi.
Izoh (0)