Toshkentdagi Versal restorani auksion orqali 35,3 milliard so‘mga sotildi. Bu haqda Elektron onlayn auksionlarni tashkil etish markazi ma’lumotlarida keltirilgan.
Ma’lumotlarga ko‘ra, 14 daqiqa davom etgan auksionda Diamond Drinks Co. MChJ 35,3 milliard so‘m taklif etib, restoranni qo‘lga kiritgan. Restoran kimoshdi savdosiga 34,6 milliard boshlang‘ich narx bilan sotuvga qo‘yilgandi.
Bunga qadar Versal restorani “Munitsipial aktivlarni boshqarish markazi” DUKning ta’sisligidagi “Tantana servis” MChJga tegishli bo‘lgan.
Versal auksionga birinchi marta qo‘yilayotgani yo‘q, 2011-yilda “Alp Jamol bank”ni tugatish komissiyasi restoranni sud qarori asosida auksionga qo‘ygandi. O‘shanda to‘yxonaning boshlang‘ich narxi taxminan 37,5 milliard so‘m deb belgilangan.
2018-yilda esa Versal restorani Tashkent City qurilishi sabab buzilgan Ezidyor’ga egalik qilgan Grand Duet kompaniyasiga berilishi mumkinligi haqida gap-so‘zlar tarqalgan. Yakunda kompaniyaga Mirzo Ulug‘bek tumanidagi “Sayohat” restorani nasib qildi. “Sayohat” ham 2011-yilda “Alp Jamol bank” ishi tufayli auksionda savdoga qo‘yilgan to‘yxonalardan biri.