O‘zbekiston oliy ta’lim muassasalariga 2020/2021-o‘quv yili uchun kirish imtihonlarida 7 toifadagi abituriyentlar uchun imtiyozli shartlarda davlat granti taqdim etiladi. Bu haqda bosh vazir o‘rinbosari Behzod Musayevga tayanib, “Kun.uz” xabar berdi.
Bosh vazir o‘rinbosarining ma’lum qilishicha, yangi o‘quv yilida imtiyozli shartlarda davlat granti asosida jami 8694 ta o‘rin ajratilmoqda. O‘tgan yilda mazkur ko‘rsatkich qariyb 5 mingta bo‘lgan.
2020/2021-o‘quv yili uchun kirish imtihonlarida imtiyozlar quyidagi 7 toifadagi abituriyentlar uchun taqdim etiladi:- nogironligi bo‘lgan shaxslar uchun — 2799 ta o‘rin;
- harbiy qo‘mondonlik tavsiyanomasi bo‘lgan shaxslar — 1175 ta o‘rin;
- harbiylarning farzandlari uchun — 1175 ta o‘rin;
- ichki ishlar organlari xodimlarining farzandlari uchun — 705 ta o‘rin;
- mehribonlik uyi tarbiyalanuvchilari uchun — 1400 ta o‘rin;
- ijtimoiy kam ta’minlangan toifadagi xotin-qizlar uchun — 940 ta o‘rin;
- So‘x tumanida yashovchi bitiruvchilar — 500 ta o‘rin.
Qayd etilishicha, bakalavriat ta’lim yo‘nalishi bo‘yicha o‘qishga qabul ko‘rsatkichi 2020-yilda 36 foizga yetkaziladi. 2019-yilda 108 915 ta o‘ringa talabalar qabul qilingan bo‘lsa, 2020-yil umumiy kvota 148 144 taga yetkazildi.
Eslatib o‘tamiz, O‘zbekistonda xotin-qizlarning OTMga kirishida qo‘shimcha to‘rt foizli davlat granti asosida kvota ajratiladi.
Ma’lumot uchun, O‘zbekistonda keyingi o‘quv yilidan faqat davlat granti kvotalari belgilanadi. To‘lov-kontrakt bo‘yicha qabul kvotasini OTMlar mustaqil belgilaydi.
Izoh (0)