Farg‘ona viloyatining Marg‘ilon shahrida Hunarmandlar bozori hamda Hunarmandchilik markazi foydalanishga topshirildi, deb xabar berdi “Daryo” muxbiri Azizjon Ermatov.
Ta’kidlanishicha, davlat-xususiy sheriklik asosida qurilgan Hunarmandchilik markazida 200 dan ortiq turdagi atlas va adras to‘qish, gilamchilik, tikuvchilik, hunarmandchilik mahsulotlari ishlab chiqarish yo‘lga qo‘yilgan.
Ayni paytda bu yerda 600 nafar usta ish boshlagan, ular tomonidan ikki mingga yaqin xotin-qizlar va yoshlar ishga jalb etilgan.
Markazning quyi qavatida atlas, adras, shoyi, baxmal, beqasam matolar to‘qiladi. Birinchi qavatdan tayyor mahsulotlar ko‘rgazmasi, podium, chevarxona o‘rin olgan. Bu yerdagi do‘konda matoga gul chizish, bog‘lash, davra, qad tayyorlash jarayonlari ko‘rgazmali tarzda namoyish etiladi. Binoning yuqori qavatida gilam sexi joylashgan. Markazda barcha mahsulotlar to‘liq qo‘l mehnati yordamida 100 foiz toza ipakdan to‘qiladi.
Hunarmandlar bozorida 45 nafar hunarmand faoliyati yo‘lga qo‘yilgan bo‘lib, 300 ta yangi ish o‘rni yaratilgan. 35 milliard so‘m mablag‘ sarflangan markazda 14 ta savdo do‘koni mavjud.
Eslatib o‘tamiz, Prezident Shavkat Mirziyoyev Farg‘ona viloyatiga tashrifi davomida Marg‘ilondagi Hunarmandlar markazini borib ko‘rgandi. 6-iyun kuni Prezident raisligida bo‘lib o‘tgan yig‘ilishda odamlarni ish bilan ta’minlash, daromadini oshirish bo‘yicha Farg‘onada ham keng ko‘lamli sa’y-harakatlar boshlangani, viloyatdagi 43 mingdan ortiq oilani 2020-yil yakuniga qadar kambag‘allikdan chiqarish maqsad qilingani aytilgandi.
Izoh (0)