Vazirlar Mahkamasining “Ro‘yxatga olinmagan qurolni, patronlarni, o‘q-dorilarni, portlovchi moddalarni va portlatish qurilmalarini ichki ishlar organlariga o‘z ixtiyori bilan topshirish tartibi to‘g‘risidagi nizomni tasdiqlash haqida”gi qarori loyihasi e’lon qilindi.
Unga ko‘ra, ro‘yxatga olinmagan qurolni, patronlarni, o‘q-dorilarni, portlovchi moddalarni va portlatish qurilmalarini ichki ishlar organlariga o‘z ixtiyori bilan topshirish tartibi to‘g‘risidagi nizom tasdiqlanadi.
Nizom bilan jismoniy va yuridik shaxslar tomonidan muomalada bo‘lgan ro‘yxatga olinmagan (noqonuniy muomalada bo‘lgan) qurolni, patronlarni, o‘q-dorilarni, portlovchi moddalarni va portlatish qurilmalarini ichki ishlar organlariga o‘z ixtiyori bilan topshirish hamda qurol va (yoki) patronlarni topshirganlik uchun taqdirlash tartibi belgilanadi.
Jismoniy yoki yuridik shaxs ichki ishlar organlariga qurol va (yoki) ularning o‘q-dorilarini o‘z ixtiyori bilan topshirganligi uchun pul mukofoti bilan taqdirlanishi, 1974-yilgacha ishlab chiqarilgan fuqaroviy o‘qotar qurol topshirgan jismoniy shaxs esa uni imtiyozli olish huquqiga ega bo‘lishi mumkin.
Qurol va (yoki) patronlarni o‘z ixtiyori bilan topshirgan arizachining xohishiga ko‘ra, pul mukofoti naqd shaklda yoki uning hisob raqamiga pul o‘tkazish yo‘li bilan Qoraqalpog‘iston Respublikasi Ichki ishlar vazirining, Toshkent shahar va Toshkent viloyati ichki ishlar bosh boshqarmalari hamda viloyatlar ichki ishlar boshqarmalari boshliqlarining taqdirlash to‘g‘risidagi buyrug‘i e’lon qilingan kundan boshlab besh ish kunidan ko‘p bo‘lmagan muddatda tegishli moliya-iqtisod boshqarma (bo‘lim)lari tomonidan amalga oshiriladi.
O‘z ixtiyori bilan topshirilgan qurol va o‘q-dorilar uchun pul mukofoti bazaviy hisoblash miqdori (223 000 so‘m)ning foizdagi nisbatidan kelib chiqib belgilanadi. Xususan,
- jangovar o‘qotar qurolning bir donasi uchun BHMning 200 foizi;
- soyli stvolli o‘qotar ov va sport quroli, kombinatsiyalangan o‘qotar qurol, shu jumladan, almashtiriladigan va joylashtiriladigan soyli stvolli o‘qotar ov qurolining bir donasi uchun 150 foizi;
- og‘iz qismidagi quvvat 65 jouldan yuqori va kalibri 9 millimetrdan ortiq bo‘lgan pnevmatik ov qurolining bir donasi uchun 100 foizi miqdorida mukofot puli beriladi.
Izoh (0)