Qozog‘istonda koronavirusga chalinganlar soni 7597 nafarga, Qirg‘izistonda esa 1350 kishiga yetdi

Qozog‘istonda o‘tgan bir sutka ichida koronavirus bilan kasallanish bo‘yicha yana 363 ta holat qayd etildi, deb xabar beradi Tengrinews.

Shu bilan birga, Pavlodar, Mang‘istov va Sharqiy Qozog‘iston viloyatlarida kasallikka chalinish bo‘yicha birorta ham holat aniqlanmagan. Ushbu viloyatlarda 21-may holatiga ko‘ra, kasallar soni quyidagicha:

• Pavlodar viloyati — 176;
• Mang‘istov viloyati — 164;
• Sharqiy Qozog‘iston viloyati — 59 kishi.

Butun mamlakat bo‘ylab koronavirusga chalinganlar soni 7597 kishiga yetdi. Hozirga qadar 3843 nafar bemor sog‘ayishga muvaffaq bo‘lgan, 35 kishi esa virus qurboniga aylangan.Qirg‘izistonda 22-may holatiga ko‘ra yana 37 kishida COVID-19 aniqlangan. Bu haqda mamlakat sog‘liqni saqlash vazirligiga tayanib, “Kloop” xabar berdi.

• Bishkekda — 9 ta holat (ularning 3 nafari Sankt-Peterburgdan kelgan);
• Chuy viloyatida — Sol-Ileskdan kelgan 1 kishi;
• O‘sh viloyati — 6;
• Norin viloyati — 21.

“Bir muammoga to‘xtalmoqchiman. Haligacha 38-40 ga yaqin yangi holatlar aniqlanmoqda. Ayrimlarda kasallik belgilarsiz o‘tyapti, odamlar bir-biri bilan aloqa qilmoqda. Aloqalarning ko‘pligidan kasallanish holatlari ortmoqda. Masalan, Norin viloyatida bir nafar xodim boshqa bir tumanga ish bilan borgan va ko‘pchilik bilan aloqada bo‘lib, kasallik yuqtirgan. Kasallikka chalinganlar orasida keksalar va bolalar ham bor”, — deydi mamlakat sog‘liqni saqlash vaziri o‘rinbosari Nurbolot Usenbayev.

Ta’kidlanishicha, butun mamlakat bo‘ylab COVID-19 koronavirus infeksiyasini 273 nafar tibbiyot xodimi yuqtirib olgan bo‘lib, hozirga qadar ularning 224 nafari davolanishga muvaffaq bo‘lgan.

Mamlakatda koronavirusga chalinganlarning jami soni 1350 kishiga yetgan. O‘tgan bir sutka davomida 20 kishi sog‘aygan bo‘lib, Qirg‘izistonda pandemiya boshlanganidan buyon koronavirusdan davolanganlar soni 949 kishini tashkil etmoqda.

Tojikistonda 21-may holatiga ko‘ra, koronavirus bilan kasallanganlar soni 210 kishiga ortib, jami kasallar soni 2350 kishiga yetdi, deb xabar beradi “RIA Novosti”.

Ta’kidlanishicha, o‘tgan bir sutka davomida mamlakatda 3 kishi virus oqibatida vafot etgan. Tojikistonda hozirda 3533 kishi shifokorlar nazorati ostida qolmoqda, bir sutka ichida 1008 kishi kasallikdan sog‘aygan.

O‘zbekistonda esa 22-may soat 10:00 holatiga ko‘ra, koronavirus infeksiyasi qayd etilganlar soni 3006 nafarni tashkil qilmoqda. Shu vaqtga qadar koronavirus infeksiyasiga chalingan 2407 nafar fuqaro butunlay sog‘ayib, davolanishda bo‘lgan 5 nafar bemorning ahvoli og‘ir.