Qirg‘izistonda koronavirus bilan kasallanish bo‘yicha yana 25 ta holat aniqlandi, deb xabar beradi “Kloop.kg”.
COVID-19 koronavirus infeksiyasi bilan kasallanish bo‘yicha aniqlangan so‘nggi holatlarning 11 nafari Norin viloyati hisobiga to‘g‘ri kelmoqda. Shuningdek, Jalolobod va Chuy viloyatlarida — to‘rt nafardan, O‘shda — uch kishida, Bishkekda — ikki kishi hamda Botken viloyatida — bir kishida koronavirus aniqlangan.
Butun mamlakat bo‘ylab koronavirusga chalinganlar soni 931 kishiga yetgan, ularning 658 nafari davolanishga muvaffaq bo‘lgan — 9-may kuni sakkiz nafar bemorga javob berilgan.
Qirg‘izistonda koronavirus pandemiyasi boshlanganidan buyon 12 kishi COVID-19 qurboniga aylangan, ulardan bir nafari — tibbiyot xodimi. Hozirda 261 kishi shifoxonalarda qolmoqda, olti nafarining ahvoli og‘ir.
Eslatib o‘tamiz, 4-may kuni O‘zbekiston Prezidenti Shavkat Mirziyoyev Qirg‘iziston prezidenti So‘ronboy Jeenbekov bilan telefon orqali muloqot qilib, koronavirusga qarshi kurashdagi hamkorlik masalalarini muhokama qilgandi.
O‘zbekistonda 9-may soat 10:00 holatiga ko‘ra, koronavirusga chalinganlar soni 2336 nafarga yetdi. Mamlakatda koronavirus infeksiyasi ilk bor qayd etilgan 15-martdan buyon 1775 kishi kasallikdan sog‘aydi, 10 kishi esa infeksiya asoratlari oqibatida vafot etdi.
Izoh (0)