Prezident Shavkat Mirziyoyev 8-may kuni Qozog‘iston birinchi prezidenti — Elboshi Nursulton Nazarboyev bilan telefon orqali muloqot qildi, deya xabar bermoqda Prezident matbuot xizmati.
Suhbat avvalida ikki mamlakat yetakchilari Ikkinchi jahon urushida qozonilgan G‘alabaning 75 yilligi munosabati bilan bir-birlarini samimiy tabriklab, ezgu tilaklar bildirgan. “Janggohlarda jonini ayamay, front ortida fidokorona mehnat qilib, G‘alabaga erishgan ota-bobolarimizning jasorati va qahramonligi birodar xalqlarimizning minnatdor xotirasida mangu qolishi alohida qayd etildi”, — deyiladi rasmiy axborotda.
Muloqot chog‘ida chegaraoldi hududlarda Sardoba suv omboridagi favqulodda hodisa oqibatlarini bartaraf etish bilan bog‘liq masalalar ko‘rib chiqilgan. Aholiga zarur yordamni ko‘rsatish, infratuzilma va kommunikatsiyalarni qayta tiklash borasida birgalikda amalga oshirilayotgan birinchi navbatdagi tadbirlar qo‘llab-quvvatlangan.
O‘zbekiston va Qozog‘istonda koronavirus infeksiyasi tarqalishiga qarshi kurash samarali kechayotgani mamnuniyat bilan qayd etilib, ushbu xavfli kasallikning oldini olish va davolashda vakolatli idoralarning yaqindan muvofiqlashuvi va hamkorligini davom ettirish muhimligi ta’kidlangan.Shavkat Mirziyoyev va Nursulton Nazarboyev ikki tomonlama strategik sheriklik munosabatlarini, avvalo savdo-iqtisodiy sohada kengaytirish masalalariga alohida to‘xtalgan. Pandemiyaning salbiy oqibatlari ta’sirini kamaytirish maqsadida amaliy hamkorlikning yangi loyihalari va yo‘nalishlarini ishlab chiqishda ikki mamlakat bosh vazirlari rahbarligidagi qo‘shma Hukumatlararo komissiyaning muhim rol o‘ynashi ta’kidlangan.
“Shuningdek, xalqaro ahamiyatga molik dolzarb masalalar hamda Markaziy Osiyo mintaqasida yaxshi qo‘shnichilik munosabatlarini yanada mustahkamlash yuzasidan fikr almashildi”, — deyiladi Prezident matbuot xizmati axborotida.
Izoh (0)