Samarqand viloyatining Urgut tumanida ehtiyojmand oilalar uchun mo‘ljallangan arzon unning bir qopiga 15 ming so‘mdan ustama narx qo‘shib sotgan mahalla raisi 15 sutkaga qamaldi. Bu haqda “Daryo” muxbiri xabar bermoqda.
Ma’lum bo‘lishicha, 18-aprel kuni Urgut tumani “Yuqori Qayroqli” MFY raisi O‘.A. 145 ming so‘mdan sotilishi lozim bo‘lgan 48 qop unni mahalla fuqarolariga 160 ming so‘mdan sotgan.
IIB xodimi Ergash Najmiyev mahalla raisining bu harakati noqonuniy ekanligini aytib, suhbat o‘tkazish uchun raisni IIB binosiga olib bormoqchi bo‘lgan.
MFY raisi esa ichki ishlar xodimining qonuniy talabini bajarmasdan, fuqarolarni ichki ishlar xodimlariga bo‘ysunmaslikka da’vat qilib, qarshilik ko‘rsatgan.
Aniqlanishicha, mahalla raisi tuman hokimligi va boshqa mutasaddi tashkilotlar tashabbusi bilan ehtiyojmand oilalarga ajratilgan 60 qop unni o‘z narxida shaxsiy mablag‘iga sotib olgan.
Ammo mutasaddi tashkilot vakillarining ishtirokisiz sotmaslik haqida rasman ogohlantirilgan bo‘lsa-da, vaziyatdan foydalanib, noqonuniy tadbirkorlik faoliyati bilan shug‘ullanib, boylik orttirmoqchi bo‘lgan.
Sud majlisida MFY raisi o‘z aybiga iqror bo‘lib, uyiga un so‘rab kelganlarga 145 ming so‘mlik unni 160 ming so‘mdan sotganini, IIB xodimiga qarshilik ko‘rsatganini tan olgan.
Urgut tuman ma’muriy sudi raisi Akmal Alimovning “Daryo”ga ma’lum qilishicha, fuqaro O‘.A. Ma’muriy javobgarlik to‘g‘risidagi kodeksning 176-moddasi 1-qismi (davlat ro‘yxatidan o‘tmasdan noqonuniy tadbirkorlik faoliyati amalga oshirish), 194-moddasi 1-qismi (ichki ishlar organlari xodimining qonuniy talablarini bajarmaslik), 195-moddasi (ichki ishlar organlari xodimlarining o‘z xizmat burchlarini bajarishlariga qarshilik ko‘rsatish) bilan aybli deb topilgan va 1 million 115 ming so‘m jarima hamda 15 sutka ma’muriy qamoq bilan jazolangan.
Izoh (0)