Prezidentning “O‘zbekiston Respublikasida surishtiruv va dastlabki tergov organlarining faoliyatini yanada takomillashtirish to‘g‘risida”gi farmoni loyihasi e’lon qilindi.
Farmonga ko‘ra, Bosh prokuratura, Davlat xavfsizlik xizmati, Ichki ishlar vazirligi, Davlat bojxona qo‘mitasi va Milliy gvardiya tergov organlarida surishtiruvchi va tergovchi lavozimiga kadrlar zaxirasini yaratish, yosh mutaxassislarda tergov harakatlarini o‘tkazish ko‘nikmalarini shakllantirish, ushbu sohada “ustoz-shogird” an’analarini mustahkamlash maqsadida “tergovchi-yordamchi” lavozimi joriy etilishi mumkin.
Ushbu lavozimga ta’lim muassasasini tugatgach mazkur organlarga ilk bor xizmatga qabul qilingan xodimlar tayinlanadi va bir yil davomida mazkur lavozimda xizmat olib boradi. Prokuratura, DXX va Ichki ishlar organlariga mustaqil tergovchi sifatida tayinlanishida xodimning “tergovchi-yordamchi” lavozimida faoliyat yuritgani birinchi navbatda inobatga olinadi.
Birinchi marotaba mustaqil tergovchi lavozimiga tayinlangan shaxslarga ushbu lavozimlarda ko‘p yillar samarali mehnat qilib, tegishincha prokuratura, Davlat xavfsizlik xizmati va ichki ishlar organlarida xizmat qilayotgan shaxslar orasidan murabbiy biriktiriladi. Birinchi marotaba mustaqil tergovchi lavozimiga tayinlangan shaxsni 3 yil davomida boshqa sohaviy yo‘nalishlarga, shu jumladan, yuqori tergov organlariga tergovchi lavozimlariga xizmatga o‘tkazishga yo‘l qo‘yilmaydi.
Mahkumlar va tergov hibsxonalarida saqlanayotgan shaxslarning huquqlarini ta’minlash, ularning sha’ni va qadr-qimmati hurmat qilinishi ustidan nazoratni kuchaytirish maqsadida Oliy Majlisning Inson huquqlari bo‘yicha vakili (Ombudsman) o‘rinbosari — Tergov hibsxonalari va ozodlikdan mahrum etish joylarida inson huquqlari bo‘yicha vakil lavozimi joriy etiladi.
Tergov hibsxonalari va ozodlikdan mahrum etish joylarida inson huquqlari bo‘yicha vakilga yuklatilgan vazifalarning samarali bajarilishini ta’minlash maqsadida Oliy Majlisning Inson huquqlari bo‘yicha vakili (Ombudsman) kotibiyati tuzilmasiga 16 ta qo‘shimcha shtat birligi ajratiladi.
Izoh (0)