O‘zbekistonda koronavirusga chalinganlar soni 9-aprel Toshkent vaqti bilan soat 10:00 holatiga ko‘ra 9 nafarga oshib, 555 kishiga yetdi. Bu haqda Sog‘liqni saqlash vazirligi xabar berdi. Avvalroq 8-aprel Toshkent vaqti bilan soat 23:00 holati bo‘yicha virusni yuqtirib olganlar soni 546 nafarga yetgani ma’lum qilingandi.
Mamlakatda koronavirus infeksiyasiga chalinish bilan bog‘liq dastlabki holat qayd etilganidan beri (15-martdan buyon) 30 kishi kasallikdan sog‘ayishga muvaffaq bo‘ldi, ayni vaqtda uch kishi (bir ayol va ikki erkak) koronavirus sabab vafot etdi.
Qayd etish joiz, 4—7-aprel kunlari O‘zbekistonda koronavirusga chalinish bilan bog‘liq holatlar ayniqsa ko‘p qayd etildi. Xususan, 6-aprel kuni 115 kishida koronavirus aniqlangan — bu kunlik rekord; shuningdek, 6-aprel soat 10:00 dan 7-aprel soat 15:00 gacha bo‘lgan oraliqda, Buxoro (65 nafarga) va Qoraqalpog‘istonda (sakkiz barobarga) bemorlar soni keskin ko‘paygan.
O‘zbekistondan tashqari Avstriya, Armaniston, AQSh, BAA, Janubiy Koreya, Pokiston, Rossiya, Tailand va Qozog‘istonda ham jami 23 nafar vatandoshda koronavirus aniqlangan, ulardan uch nafari (barchasi AQShda) vafot etgan. Vafot etganlardan biri O‘zbekistonda xizmat ko‘rsatgan artist, taniqli shashmoqam ijrochisi Rustam Samarqandiy edi.
Izoh (0)