Koronavirus infeksiyasi tarqalishining oldini olish maqsadida 6-apreldan boshlab Toshkent shahrining 11 ta tumanidagi 514 ta mahalla qoshida “Jamoatchilik nazorati maskani” tashkil etildi, deb xabar bermoqda poytaxt IIBB matbuot xizmati.
Qayd etilishicha, “Mahallamizni koronavirusdan asraymiz” shiori ostida tashkil topgan bunday maskanlarda faoliyat yuritish uchun mahalla raisi, hududga qarashli profilaktika inspektori va uning yordamchisi, “Fidokor” yoshlar guruhi a’zolari hamda mahalla faollaridan iborat guruh tuzildi.
Har bir guruhning bosh vazifasi karantin sharoitida mahallalarda istiqomat qiluvchi fuqarolarning o‘ta zarurat yuzaga kelgandagina (kerakli bo‘lgan oziq-ovqat mahsulotlari va dori-darmon sotib olish) ko‘chaga chiqishlarini hamda niqob taqmasdan harakatlanmasligini to‘liq nazorat qilish hisoblanadi.
“Eng asosiysi ‘Jamoatchilik nazorati maskani’ a’zolari tun-u kun mahallalarda yurib, fuqarolarning zaruratsiz tashqariga chiqmasligi va karantin tartib-qoidalariga amal qilishini ta’minlaydi. Bu o‘z navbatida fuqarolarimizni koronavirus infeksiyasini yuqtirib olishdan saqlaydi”, — deyiladi xabarda.
Izoh (0)