Rossiya hamda AQSh prezidentlari Vladimir Putin va Donald Tramp telefon orqali muloqot qildi. Bu haqda Kreml matbuot xizmati xabar qilgan.
Ular ikki davlatning COVID-19 koronavirusi pandemiyasiga qarshi kurashdagi o‘zaro hamkorligi haqida suhbat qurgan. Muloqot Amerika tomonining tashabbusi bilan o‘tkazilgan.
“Davlat rahbarlari dunyoda koronavirusning tarqalishida tashvishda ekanini bildirib, Rossiya va AQShda ushbu xavfga qarshi kurashish borasida amalga oshirilayotgan chora-tadbirlar haqida fikr almashdi”,— deyiladi xabarda.
Mavzuga doir:
- Rossiyada koronavirusga qarshi kurash uchun 3 turdagi dori ishlab chiqilgani ma’lum qilindi
- Johnson & Johnson kompaniyasi 2020-yilning sentabrida koronavirusga qarshi vaksinaning odamlardagi sinovini boshlaydi
- Tramp AQShning koronavirus pandemiyasidan tiklanishi taxminan qachondan boshlanishini aytdi
- Moskvaning barcha aholisi uchun uy sharoitida izolyatsiyalanish rejimi joriy etildi
Rossiya federatsiyasi prezidentining matbuot kotibi Dmitriy Peskov Putinning Trampdan antirossiyachilik sanksiyalarini olib tashlashni so‘ramaganligini qayd etdi. Avval AQSh prezidenti Fox News telekanali efirida rossiyalik hamkasbining bir necha marta sanksiyalarni bekor qilishni so‘rab murojaat qilganini aytib o‘tgandi. Tramp telefon orqali suhbat rejalashtirilayotganini e’lon qilgan vaqtida neft narxining tushib ketishi sabab energetika sektori talafot ko‘rishini istamasligini ta’kidlagan.
Eslatib o‘tamiz, 30-mart kuni Brent markali neft narxi 2002-yil noyabridan beri ilk bora 23 AQSh dollaridan ham arzonlashdi. Mart boshidan beri neft narxi qariyb ikki baravar pastlagan. Ushbu voqealar OPEK+ kelishuvining bekor bo‘lishi va Saudiya Arabistonining neft ishlab chiqarish hajmini oshirishi oqibatida yuz bermoqda. Bloomberg nashri Amerika operatorlarining neft ishlab chiqaruvchilardan “qora oltin” olish hajmini kamaytirishni so‘ragani haqida xabar bergandi. Agentlik ekspertlarining qayd etishicha bu neft ishlab chiqarish hajmi uni saqlash uchun mo‘ljallangan joylarga nisbatan oshib ketganini anglatadi.
Avval Rossiyaning Urals neft partiyasining narxi 1999-yildan beri kuzatilmagan darajada pasaygani hamda Norvegiyaning neft bozoriga qaqshatqich zarba berishga tayyorgarlik ko‘rayotgani haqida xabarlar berilgan.
Izoh (0)