Senatning videokonferensaloqa shaklida o‘tkazilayotgan 3-yalpi majlisida Tuproqqal’a tumanini tashkil etish masalasi ko‘rib chiqiladi

O‘zbekiston Oliy Majlisi Senatining uchinchi yalpi majlisi 24-mart kuni o‘z ishini boshladi. Bu haqda Senat axborot xizmati xabar berdi.

Ma’lum qilinishicha, aholining sanitariya-epidemiologik osoyishtaligini ta’minlash va koronavirus infeksiyasi tarqalishining oldini olish maqsadida, shuningdek, Toshkent shahriga kirish va chiqish 2020-yilning 24-mart kunidan boshlab to‘xtatilganligi munosabati bilan yalpi majlis videokonferensaloqa shaklida o‘tkazilmoqda.

Senatorlar tomonidan yalpi majlis kun tartibiga kiritilgan qator masalalar ko‘rib chiqilishi rejalashtirilgan. Jumladan, Senat a’zolari Xorazm viloyati tarkibida Tuproqqal’a tumanini tashkil etish hamda Hazorasp tumani chegarasini o‘zgartirish to‘g‘risidagi masalani ko‘rib chiqadi.

Shuningdek, “O‘zbekiston Respublikasining Jinoyat, Jinoyat-protsessual kodekslariga hamda Ma’muriy javobgarlik to‘g‘risidagi kodeksiga o‘zgartish va qo‘shimchalar kiritish haqida”gi, “Fuqarolarning shaxsiy huquq va erkinliklarini muhofaza qilishga qaratilgan qonun hujjatlari takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi, “O‘zbek tili bayrami kunini belgilash to‘g‘risida”gi, “III va IV darajali ‘Sog‘lom avlod uchun’ ordenini ta’sis etish to‘g‘risida”gi, “‘Sog‘lom avlod uchun’ medalini ta’sis etish to‘g‘risida”gi O‘zbekiston Respublikasi qonunlari parlament yuqori palatasi a’zolari tomonidan muhokama qilinadi.

Eslatib o‘tamiz, avvalroq Oliy Majlis Qonunchilik palatasida karantin e’lon qilingan edi.