Italiya bosh vaziri Juzeppe Konte mamlakat shimolida tarqalgan koronavirus infeskiyasiga qarshi amalga oshirilgan chora-tadbirlar yaqin kunlarda o‘z samarasini berishiga ishonishini ma’lum qildi. Bu haqda “RIA Novosti” xabar bergan.
“Ushbu vaziyatda xavotirda emasman, biz favqulodda holatga noto‘g‘ri baho berayapmiz deya olmayman, lekin amalga oshirilgan ishlardan keyin yaqin kunlarda ularning samarasini ko‘rishimizga ishonaman”, – degan Konte jurnalistlar bilan suhbatda.
Kontening so‘zlariga ko‘ra, kasalliklarning davri koronavirusga testlar sonining haddan ziyod ko‘payishiga sabab bo‘ldi.
“Kimningdir isitmasi baland bo‘lib, unda tumov kuztilsa, bu bemor zudlik bilan koronavirusga test topshirishi lozim degani emas, juda kam holatlardagina bu tojvirus ekani o‘z tasdig‘ini topmoqda. So‘nggi kunlardagi tekshiruvlar borasida bir oz oshirib yuborilgani, ilm-fan olami talablariga mos kelmaydi: yakunda favqulodda holatdan battar drama boshlanishi mumkin. Ko‘rsatmalarga amal qilish kerak, aks holda yolg‘on axborotlar muhitida o‘zimizni o‘zimiz aldab qo‘yamiz”, – deydi bosh vazir.
Avval JSST vakili Italiyada koronavirusni tekshirish uchun 4 mingta test amalga oshirilgani, Fransiyada u raqam 300 taga tengligini bildirgan.
Konte hukumatning avval koronavirusga qarshi kurash uchun ajratilgan 20 million yevroga yana qo‘shimcha mablag‘ ajratishga tayyorligiga urg‘u bergan.
“Ushbu favqulodda vaziyatning iqtisodga salbiy ta’sirini barataraf qilish uchun vaqt talab qilinadi. Bu borada batafsil tahlilni amalga oshirish lozim”, – degan Konte.
O‘tgan haftada Italiya vazirlar kengashi mamlakatdagi epidemiologik xavfni bartaraf qilish yuzasidan qonun kuchiga ega dekret qabul qilgan: xususan, omma uchun Italiya shimolidagi beshta katta sport tadbiri bekor qilingan, mamlakat hududi va xorijga maktab o‘quvchilarining har qanday safariga taqiq qo‘yilgandi. Ushbu qoidalarning joriy etilgani sabab barcha yollanma ishchilar masofadan turib mehnat qilishga o‘tdi. Shimoldagi oltita viloyat hokimliklari maktablar va universitetlarni kamida bir hafta muddatga yopdi. Bundan tashqari, hokimliklarga koronavirus tarqalishini oldini olish maqsadida karantin e’lon qilish vakolatlari berildi. Hozirda Italiyada ikki hudud – Lombardiyada Kodonyo shaharchasi yaqinida 10 ta kommuna izolyatsiya qilingan, shuningdek Veneto viloyatidagi Vo shahri karantinda.
Apennin yarim orolida 25-fevral holatiga koronavirusga yo‘liqqan bemorlar soni 280 nafardan oshib ketgan. Yetti nafar fuqaro vafot etgan, ulardan oltitasi Italiya shimolidagi Lombardiyada yashagan. Barcha o‘lim holatlari yoshi keksa insonlarda, xususan o‘simta kasalliklari bilan og‘riganlarda kuzatilgan.
Izoh (0)