Samarqand viloyati Payariq tumani Chelak shahri Ko‘ktepa qishlog‘idagi raqamsiz uydan 22-fevral kuni 40 yoshli J.G. ismli erkak osilgan holda topildi, deya xabar bermoqda Bosh prokuratura matbuot xizmati.
“Uning cho‘ntagida 17-fevral kuni Jizzax shahri “Kimyogar” mahallasi Sayilgoh ko‘chasidagi xonadonda 1991-yilda tug‘ilgan rafiqasi N.G.ni qasddan o‘ldirib, ustidan qulflab ketgani haqidagi xati mavjudligi aniqlangan”, — deyiladi prokuratura axborotida.
Xatdagi ma’lumotga asosan Jizzax shahar “Kimyogar” mahallasi Sayilgoh ko‘chasidagi xonadon ko‘zdan kechirilganida N.G. ismli ayolning murdasi qotillik alomatlari bilan topilgan. Ekspertiza xulosasiga ko‘ra, ayol bo‘g‘ib o‘ldirilgan.
“Mazkur holat yuzasidan shu kuni Jizzax shahar prokuraturasi tomonidan Jinoyat kodeksining 97-moddasi 1-qismi (Qasddan odam o‘ldirish) bilan jinoyat ishi qo‘zg‘atilgan”, — deya qo‘shimcha qilingan prokuratura axborotida.
Izoh (0)