Ichki ishlar vazirining jamoat tartibini saqlash bo‘yicha o‘rinbosari Azizbek Ikromov yangi lavozimga tayinlandi, deb xabar bermoqda IIV matbuot xizmati.
Bugun, 19-fevral kuni, Vazirlar Mahkamasida o‘tkazilgan yig‘ilishda unga yangi tashkil etilgan Mahalla va oila masalalari vazirligiga vazir o‘rinbosari vazifasini bajarish yuklatildi.
Qayd etilishicha, u bir vaqtning o‘zida Ichki ishlar vaziri o‘rinbosari lavozimidagi faoliyatini ham davom ettiradi. Aziz Ikromov, shuningdek, O‘zbekiston Regbi federatsiyasi vitse-prezidenti hamdir.
Aziz Ikromov bungacha Mudofaa vaziri o‘rinbosari lavozimida ham faoliyat yuritgan. U 2019-yilning noyabr oyidan boshlab Ichki ishlar vaziri o‘rinbosari lavozimida ishlab kelmoqda.
Eslatib o‘tamiz, Oliy Majlis Qonunchilik palatasining 18-fevral kuni o‘tkazilgan navbatdagi majlisida O‘zbekiston Prezidentining “Jamiyatda ijtimoiy-ma’naviy muhitni sog‘lomlashtirish, mahalla institutini yanada qo‘llab-quvvatlash hamda oila va xotin-qizlar bilan ishlash tizimini yangi darajaga olib chiqish chora-tadbirlari to‘g‘risida”gi farmonini tasdiqlash masalasi ko‘rib chiqilgandi.
Prezidentning mazkur farmoni bilan O‘zbekiston Mahalla va oilani qo‘llab-quvvatlash vazirligi tashkil etilishi ma’qullangan, yangi tuzilma rahbari etib Rahmat Mamatov nomzodi ma’qullangandi.
Izoh (0)