O‘zbekistonning Sankt-Peterburg shahridagi bosh konsulxonasi 7-fevral kuni shahar istirohat bog‘laridan birida to‘rt nafar shaxs O‘zbekiston fuqarosi S.N.ga hujum qilgani to‘g‘risida tarqalgan xabarni tasdiqladi. Bu haqda Tashqi ishlar vazirligi xabar berdi.
Ta’kidlanishicha, O‘zbekiston fuqarosiga 26-son shahar shifoxonasida zarur tibbiy yordam ko‘rsatilganidan so‘ng ruxsat berilgan.
Huquqni muhofaza qiluvchi organlardan olingan ma’lumotga ko‘ra, mazkur holat bo‘yicha jinoiy ish qo‘zg‘atilgan, ushbu jinoyatni sodir etganlikda gumonlanayotganlar qo‘lga olingan. Tergov tadbirlari davom etmoqda.
Bosh konsulxona vaziyatni o‘z nazoratiga olgan.
O‘zbekiston Tashqi mehnat migratsiyasi agentligining Rossiyadagi vakolatxonasi aniqlagan ma’lumotlarga ko‘ra, jabrlanuvchi yashaydigan kvartirasiga o‘zi yetib borgan va tez yordam chaqirgan. Unga darhol tibbiy xizmat ko‘rsatilgan. Hozirda uning ahvoli qoniqarli.
Konsullik-huquqiy departamenti Rossiyaning Shimoli-g‘arbiy federal okrugi (Arxangelsk viloyati, Kaliningrad viloyati, Kareliya Respublikasi, Komi Respublikasi, Leningrad viloyati, Murmansk viloyati, Nenes avtonom okrugi, Novgorod viloyati, Pskov viloyati, Sankt-Peterburg shahri, Vologda viloyati) hududida bo‘lib turgan fuqarolar zarur vaziyatlarda mamlakatning Sankt-Peterburg shahridagi bosh konsulxonasiga quyidagi telefon raqami orqali murojaat qilishi mumkinligini eslatib o‘tgan: +7-965-029-41-49.Eslatib o‘tamiz, Peterburgda o‘smir yigit 25 yoshli o‘zbekistonlik migrantning yuziga qarata o‘q uzgan edi. Yigit o‘zining bu qilmishini 2 yil avval maktabda O‘rta Osiyodan bo‘lgan bolalar uni tahqirlaganiga javob sifatida izohlagan.
Izoh (0)